ప్రేక్షక దేవుళ్లను తక్కువ అంచనా వేస్తే బోల్తాపడినట్టేనని హీరోయిన్ సమంత అన్నారు. తాను నటించి వెబ్ సిరీస్ "సిటాడెల్: హనీ బన్నీ". ఈ వెబ్ సిరీస్ ప్రమోషన్ కార్యక్రమాలు ముమ్మరంగా సాగుతున్నాయి. ఇందులో పాల్గొన్న సమంత మాట్లాడుతూ, ప్రేక్షకులను ఎపుడూ తక్కువ అంచనా వేయరాదన్నారు. ఆడియన్స్ ప్రతి ఒక్క విషయాన్ని ఎంతో సునిశితంగా గమనిస్తుంటారని, అందుకే నటీనటులు, టెక్నీషియన్లు ఏం చేసినా బాధ్యతలో పని చేయాలని సూచించారు.
తాను ఏదైనా అంశాన్ని చేపట్టినపుడు అందుకు పూర్తి బాధ్యత తానే స్వీకరిస్తానని వెల్లడించింది. సినిమాల్లో పాత్రను ఎంచుకోవడానికి కూడా అదే సూత్రాన్ని పాటిస్తానని చెప్పారు. ఈ కారణంగానే తాను సెలెక్టివ్‌గా సినిమాలు ఎంచుకుంటూ కెరీర్‌ను కొనసాగిస్తున్నట్టు చెప్పారు. అలాగే, వాణిజ్య ప్రకటనలు చేయాల్సి వచ్చినా ఈ అంశానికే అధిక ప్రాధాన్యత ఇస్తానని తెలిపారు. ముఖ్యంగా, మహిళలకు ప్రాధాన్యత ఉండే పాత్రలవైపు మొగ్గు చూపుతానని సమంత పేర్కొన్నారు.