నువ్వో ఫైటర్‌వి.. అనేక సంక్షోభాలు అధిగమించావ్... సంజూకు చిరు ఓదార్పు

బాలీవుడ్ నటుడు సంజయ్ దత్‌కు ఊపిరితిత్తుల కేన్సర్ నాలుగో దశలో ఉన్నట్టు తాజాగా నిర్వహించిన వైద్య పరీక్షల్లో తేలింది. దీంతో యావత్ సినీ ప్రపంచం దిగ్భ్రాంతికి లోనైంది. పైగా, సంజయ్ దత్‌కు అనేక మంది ధైర్య వచనాలు చెపుతూ తమ ట్విట్టర్ ఖాతాల్లో ట్వీట్లు చేస్తున్నారు. ఈ క్రమంలో మెగాస్టార్ చిరంజీవి కూడా సంజయ్‌కు ఓదార్పు వచనాలు చెబుతూ ఓ ట్వీట్ చేశారు. ముఖ్యంగా సంజయ్ దత్ ఆరోగ్య పరిస్థితి వార్త విని చిరంజీవి చలించిపోయారు. 

'అత్యంత ప్రియమైన సంజయ్ భాయ్... నువ్వింతటి తీవ్రమైన అనారోగ్య పరిస్థితులతో పోరాడుతున్నావని తెలిసి ఎంతో బాధగా ఉంది. కానీ నువ్వో ఫైటర్‌వి. ఎన్నో ఏళ్లుగా అనేక సంక్షోభాలను అధిగమించావు. ఎలాంటి సందేహం లేదు, దీన్నుంచి కూడా నువ్వు తప్పకుండా బయటికి వస్తావు. నువ్వు త్వరగా కోలుకోవాలని ప్రేమతో ప్రార్థిస్తున్నాం" అంటూ ట్వీట్ చేశారు. 

గతంలో సంజయ్ దత్ హిందీలో "మున్నాభాయ్ ఎంబీబీఎస్" సినిమా చేయగా, చిరంజీవి ఆ సినిమాను తెలుగులోకి 'శంకర్ దాదా ఎంబీబీఎస్' పేరుతో రీమేక్ చేసి భారీ హిట్‌ను సొంతం చేసుకున్నారు. ఆ సినిమా సీక్వెల్‌ను కూడా చిరు తెలుగులో చేశారు. మొత్తంమీద సంజయ్ దత్‌కు వచ్చినన్న కష్టాలు మరెవ్వరికీ రాకూడదని ఆయన అభిమానులు, ఆప్తమిత్రులు కోరుకుంటున్నారు.