వెస్ట్ బెంగాల్ రాష్ట్రంలో ఓ బుల్లితెర నటి ఆత్మహత్య చేసుకుంది. తన ప్రియుడితో సహజీవనం చేస్తూ వచ్చిన పల్లవి డే (25) ఉన్నట్టుండి బలవన్మరణానికి పాల్పడింది. ఆమె ఆదివారం తన ఇంట్లో సీలింగ్ ఫ్యాన్‌కు వేలాడుతూ కనిపించింది.
సమాచారం అందుకున్న పోలీసులు ఘటనా స్థలానికి చేరుకుని ప్రాథమిక విచారణ చేపట్టారు. ఈ విచారణలో పల్లవి డే ఆత్మహత్య చేసుకున్నట్టు ప్రాథమికంగా నిర్థారించారు.
కాగా, ఈ ఆత్మహత్య తర్వాత ఆమె ప్రియుడు షగ్నిక్ చక్రవర్తిని పోలీసులు అదుపులోకి తీసుకుని విచారించారు. ఆదివారం ఉదయం సిగరెట్ తాగి వచ్చేసరికి గది లోపల వైపు నుంచి గడియపెట్టివుందని, దీంతో తలుపు పగులగొట్టి చూడగా పల్లవి ఉరేసుకుని కనిపించిందని తెలిపారు.
కానీ, ఆమె కుటుంబ సభ్యులు మాత్రం పల్లవిది ఆత్మహత్య కాదని, ఖచ్చితంగా హత్యేనని అనుమానం వ్యక్తం చేస్తున్నారు. కాగా, గత నెల రోజులుగా వీరిద్దరూ ఒకే ఫ్లాట్‌‍లో ఉంటూ సహజీవనం చేస్తున్నారు.