వింత వ్యాధితో బాధపడుతున్న హీరోయిన్ కేథరిన్ థ్రెసా

స్టైలిష్ స్టార్ అల్లు అర్జున్ సరసన నటించిన హీరోయిన్లలో కేథరిన్ థ్రెసా ఒకరు. తన అందంతో పాటు అభినయంతో కుర్రకారు గుండెల్లో గిలిగింతలు పెట్టింది. 'ఇద్దరు అమ్మాయిలతో..', 'సరైనోడు' వంటి చిత్రాల్లో నటించిన ఈ గ్లామరస్ బ్యూటీ... ప్రేక్షకుల హృదయాల్లో మంచి స్థానాన్ని సంపాదించుకుంది. 

అయితే, టాలీవుడ్‌ చాలా సినిమాలే చేసినా ఈ అందాల భామకు ఆశించిన గుర్తింపు మాత్రం రాలేదు. అయితే కోలీవుడ్‌లో మాత్రం వరుస విజయాలతో స్టార్‌ హీరోయిన్‌గా ఆకట్టుకుంటోంది. ప్రస్తుతం తెలుగులో విజయ్ దేవరకొండ 'వరల్డ్ ఫేమస్ లవర్' చిత్రంలో ఒక హీరోయిన్‌గా నటిస్తోంది. 

తాజాగా ఓ ఇంటర్వ్యూలో తన వ్యక్తిగత విషయాలు చెబుతూ.. వింత వ్యాధితో బాధపడుతున్నానని చెప్పింది ఈ అమ్మడు. ఈ జబ్బు కారణంగా చాలా సమస్యలు ఎదుర్కొంటుందట. ఇంతకీ ఈ బ్యూటీకి వచ్చిన జబ్బు ఏంటో తెలుసా.. అనోస్మియ. ఈ జబ్బు ఉన్న వారు వాసన చూడలేరు. ఎంత సువాసన అయినా.. ఎంత దుర్వాసన అయినా వారికి తెలియదు. వాసన చూసే శక్తి వారికి అస్సలు ఉండదు.

ఈ జబ్బు ఉన్న కారణంగా భవిష్యత్తులో సమస్యలు తలెత్తకూడదనే ఉద్దేశ్యంతో పెళ్లి చేసుకోకూడదని భావిస్తుందట. లక్షల్లో ఒక్కరికి వచ్చే ఈ జబ్బు కేథరిన్‌కు రావడం పట్ల ఆమె అభిమానులు ఆవేదన వ్యక్తం చేస్తున్నారు. అయితే, ఈ వింత జబ్బు తన నటనకు ఎలాంటి అడ్డు రావడం లేదని ఆమె చెప్పుకొచ్చారు.