అలీ ఓ వైపు క్యారెక్ట‌ర్ ఆర్టిస్ట్‌గా రాణిస్తూనే మ‌రోవైపు రాజ‌కీయాల్లో కూడా చురుకుగా పాల్గొంటున్నాడు. ఆయ‌న య‌మ‌లీల సినిమాతో హీరోగా ఓ వెలుగు వెలిగిన విష‌యం తెలిసిందే. ఆ త‌ర్వాత మ‌ళ్లీ క‌మెడియ‌న్‌గా సినిమాలు చేస్తున్నారు. అయితే.. ఇప్పుడు మ‌ళ్లీ హీరోగా సినిమా చేస్తున్నాడు. అలీ హీరోగా పెదరావూరు ఫిలిం సిటీ పతాకంపై గుదిబండి వెంకట సాంబిరెడ్డి నిర్మించిన జంధ్యాల మార్క్ కామెడీ సినిమా 'పండుగాడి ఫోటోస్టూడియో'.
ప్రస్తుతం ఈ చిత్రం షూటింగ్ పూర్తి చేసుకుంది. ఈ సందర్భంగా చిత్ర దర్శకుడు దిలీప్ రాజా చిత్ర విశేషాల‌ను తెలియ‌చేస్తూ... 'స్టార్ డైరెక్టర్ సుకుమార్ గారు ఒకే చేసిన కథ ఇది."వీడు ఫోటో తీస్తే పెళ్లయి పోద్ది" అనేది ఈ చిత్ర క్యాప్షన్. ఈ చిత్రంలో హీరోకు 40 ఇయర్స్ వచ్చేవరకు పెళ్లి కాదనే నాగ దేవత శాపం ఉంటుంది. ఆ క్రమంలో హీరోయిన్ కంచు కనకరత్నం పరిచయం జరగడం, ఆమెతో ప్రేమలో పడటం మరో పక్క శాపం వల్ల జరిగే పరిణామాలే ఈ చిత్ర కథాంశం.
పూర్తి హాస్య భరిత చిత్రమిది. 1150 చిత్రాల్లో నటించిన అలీ గారు ఈ చిత్రంలో హీరోగా అద్భుతమైన నటనని ప్రదర్శించారు. హీరోయిన్‌గా రిషితను పరిచయం చేస్తున్నాం. కుటుంబ సభ్యులతో కడుపుబ్బా నవ్వుకునేలా పండుగ ఫోటో స్టూడియో సినిమా రూపొందించామన్నారు. ఈ సినిమాలో వినోద్ కుమార్, బాబు మోహన్, సుధ, జీవ, శ్రీలక్ష్మి, రామ్, జగన్ లాంటి సీనియర్ నటులతో పాటు విలక్షణమైన పాత్రల్లో సందీప్ రాజా, టీనా చౌదరి తొలి పరిచయం చేస్తున్నాం. జాన్ నెలలో ఈ చిత్రాన్ని ప్రేక్షకుల ముందుకు తీసుకురానున్నాం అని అన్నారు.
ఐతే... అలీ హీరోగా సినిమా అన‌గానే... అలీ ఇప్పుడు నీకు ఇది అవ‌స‌ర‌మా అంటున్నారు కొంతమంది జనం. మ‌రి... అలీ ఏమంటారో..?