ఇంద్రగంటి దర్శకత్వంలో నాని సరసన అదితి!

నేచురల్ స్టార్ నాని మంచిజోరు మీదున్నాడు. గత ఏడాది ‘కృష్ణార్జున యుద్ధం, దేవదాస్’ సినిమాలతో ప్రేక్షకుల ముందుకు వచ్చిన నాని, ఈ రెండు సినిమాలు ఫర్వాలేదనిపించడంతో తన తదుపరి ప్రాజెక్టుపై కాస్తంత జాగ్రత్తలు తీసుకున్నాడు. 

ఇప్పటికే ఏడాదికి రెండు మూడు సినిమాలు చేసుకుంటూ వస్తోన్న నాని.. ఈ సంవత్సరం కూడా చాలా బిజీగా గడుపుతున్నారు. గౌతమ్ తిన్ననూరి దర్శకత్వంలో రూపొందుతోన్న ‘జెర్సీ’ ఇప్పటికే విడుదలకు సిద్ధమై ఈ వేసవిలో సందడి చేయబోతోంది. 

మరోవైపు విక్రమ్ కె.కుమార్ దర్శకత్వంలో ‘గ్యాంగ్‌లీడర్’ని ఇటీవలే పట్టాలెక్కించడం జరిగింది. ఇది సెట్స్‌పైకి వెళ్లడానికి ముందే నాని మరో సినిమాను కూడా అంగీకరించేసారు. 

ఈ సినిమా తనను ‘అష్టాచమ్మా’ సినిమాతో హీరోగా పరిచయం చేసిన మోహనకృష్ణ ఇంద్రగంటి దర్శకత్వంలో తెరకెక్కబోతోంది. మల్టీస్టారర్‌ సినిమాగా రూపొందనున్న ఆ చిత్రంలో నాని సరసన అదితిరావు హైదరి నటించబోతున్నట్లు సమాచారం. 

మోహనకృష్ణ తెరకెక్కించిన ‘సమ్మోహనం’లో సుధీర్ బాబు సరసన అదితి హీరోయిన్‌గా చేసి తన అందం, అభినయంతో ప్రేక్షకులను కట్టిపడేసింది. అందుకే ఇంద్రగంటి ఆమెకు మరో అవకాశం ఇచ్చారని అంటున్నారు. ఈ మల్టీస్టారర్‌లో నానితో పాటు సుధీర్ బాబు కూడా నటించబోతున్నట్లు వినికిడి.