నేచురల్ స్టార్ నానీ పాపం... కష్టాల్లో పడ్డాడు... అయితే... దానికి కారణం ఆయన తదుపరి సినిమా పేరు మాత్రమే. నానీ ప్ర‌స్తుతం విక్ర‌మ్ కె కుమార్ దర్శకత్వంలో ఓ సినిమా చేస్తున్న సంగ‌తి తెలిసిందే. అయితే ఇటీవల ఈ సినిమాకు "గ్యాంగ్లీడర్" అనే టైటిల్‌ను ఫిక్స్ చేయడం జరిగింది. మెగా హీరో చిరంజీవి నటించిన "గ్యాంగ్ లీడర్" టైటిల్‌ని నేచురల్ స్టార్ నాని నటించబోయే సినిమాకి పెట్టుకోవడంపై ఆగ్రహం వ్యక్తం చేసిన మెగా అభిమానులు సోష‌ల్ మీడియాలో నానీపై ట్రోలింగ్‌లు ప్రారంభించారు.
'గ్యాంగ్లీడర్' టైటిల్‌ను మెగా వారసుడు రామ్‌చ‌ర‌ణ్ త‌ప్ప మ‌రెవ‌రూ వాడ‌కూడ‌ద‌ని వాదిస్తున్నారు మెగా అభిమానులు. కాగా గ‌తంలో సాయిధ‌ర‌మ్ తేజ్ కూడా త‌న సినిమాకు ఈ టైటిల్ పెడ‌దామ‌నుకున్నాడ‌నీ, అయితే ఫ్యాన్స్ నుంచి వ్య‌తిరేక‌త రావ‌డంతో ఆ ప్ర‌య‌త్నం విర‌మించుకున్నాడ‌ని స‌మాచారం. అయితే ఈ టైటిల్ గురించి ముందుగా మెగా ఫ్యామిలీకి చెప్పిన త‌ర్వాతే నాని ఈ నిర్ణ‌యం తీసుకున్నాడ‌ని మ‌రికొంద‌రు వాదిస్తున్నారు. ఏదేమైనప్పటికీ ఒక సినిమా టైటిల్ గురించి ఇలా ట్రోలింగ్‌లు గట్రా చేసేయ‌డం కాస్త కొత్త విష‌య‌మే మరి... వేచి చూద్దాం ఏం జరగనుందో.
