మరో హారర్ సినిమాలో అంజలి.. క్రిస్మస్ కానుకగా ''లీసా''

''గీతాంజలి'' లాంటి హార్రర్ సినిమాలో నటించిన సీతమ్మ వాకిట్లో సిరిమల్లె చెట్టు ఫేమ్ అంజలి.. తాజాగా మరో హారర్ సినిమాలో నటిస్తోంది. లిసా పేరిట తెలుగు, తమిళ భాషల్లో ఏక కాలంలో తెరకెక్కుతున్న ఈ సినిమాకు రాజు విశ్వనాథ్ దర్శకత్వం వహిస్తుండగా ఇందులో అంజలి ప్రధాన పాత్ర పోషిస్తోంది.

పీజీ మీడియా వర్క్స్ బ్యానర్‌పై ఈ సినిమాను నిర్మిస్తున్నారు. దేశంలోనే మొదటి సారిగా స్టీరియోస్కోపిక్ 3డీ ఫార్మాట్‌లో రూపొందుతున్న హార్రర్ పిక్చర్ ఇదే కావడం విశేషం.

కాగా ఈ సినిమాను హీలియం 8కె కెమెరాతో చిత్రీకరిస్తున్నారు. క్రిస్మస్ కానుకగా ఈ సినిమాను ప్రేక్షకుల ముందుకు తీసుకురానున్నారు. ఇప్పటికే ఈ సినిమాకు సంబంధించిన ప్రీలుక్ పోస్టర్‌ విడుదలైంది.

తాజాగా ఈ సినిమాలో అంజలి లుక్‌ను పోస్టర్ రూపంలో విడుదల చేశారు. దర్శకుడు పూరీ జగన్నాథ్ ఈ లుక్‌ను విడుదల చేయగా, ప్రేక్షకుల్లో ఇది ఆసక్తిని రేకెత్తిస్తోంది.