కరోనా వైరస్ దెబ్బకు హీరో నితిన్ వివాహం వాయిదా

కరోనా వైరస్ ప్రతి ఒక్కరినీ కలవరపెడుతోంది. చివరకు వివవాహాలను కూడా వాయిదా వేయిస్తోంది. తాజాగా ఈ కరోనా వైరస్ దెబ్బకు టాలీవుడ్ మోస్ట్ బ్యాచిలర్ నితిన్ వివాహం కూడా వాయిదాపడింది. 

నితిన్ వివాహం వచ్చే నెల 16వ తేదీన దుబాయ్‌లో గ్రాండ్‌గా జరగాల్సివుంది. కానీ, కరోనా వైరస్ దెబ్బకు దుబాయ్ అతలాకుతలమైంది. ఈ వైరస్ వ్యాప్తి చెందకుండా దుబాయ్ ప్రభుత్వం పకడ్బందీ చర్యలు తీసుకుంది. 

దీంతో దుబాయ్‌లో జరగాల్సిన నితిన్ వివాహం కూడా వాయిదాపడినట్టు ఫిల్మ్ నగర్ వర్గాల సమాచారం. ప్రపంచాన్ని వణికిస్తున్న కరోనా భయంతో విదేశీయులను పలు దేశాలు నిషేధిస్తుండటంతో, తన పెళ్లిని వాయిదా వేసుకోవాలని నితిన్ నిర్ణయించుకున్నారని సమాచారం.

ఇప్పటికే పెళ్లి పనులు కూడా మొదలు కాగా, వచ్చే నెల 15వ తేదీన ప్రీ వెడ్డింగ్ కార్యక్రమాలు, ఆపై 16వ తేదీన రిసెప్షన్ కూడా ప్లాన్ చేసుకున్నారు. దుబాయ్‌ని కూడా కరోనా పట్టి పీడిస్తుండటంతో వివాహాన్ని వాయిదా వేసుకునేందుకే నితిన్ మొగ్గు చూపుతోంది. 

మరోవైపు, హైదరాబాద్‌లో వివాహం చేసుకోవాలని కొందరు బంధుమిత్రులు సలహా ఇస్తున్నట్టు సమాచారం. అయితే, ఈ వివాహం రద్దుపై నితిన్ ఫ్యామిలీ నుంచి అధికారికంగా క్లారిటీ రావాల్సివుంది.