దర్శక ధీరుడు ఎస్ఎస్ రాజమౌళి తెరకెక్కిస్తున్న కొత్త ప్రాజెక్టు ఆర్ఆర్ఆర్. జూనియర్ ఎన్టీఆర్, రామ్ చరణ్‌లు హీరోలుగా నటిస్తుంటే అలియా భట్, ఒవీలియా మోరిస్ హీరోయిన్లుగా నటిస్తున్నారు. ప్రముఖ నిర్మాత డీవీవీ దానయ్య ఈ ప్రాజెక్టును అత్యత ప్రతిష్టాత్మకంగా, భారీ బడ్జెట్‌తో నిర్మిస్తున్నారు.
ఇప్పటికే 75 శాతం మేరకు షూటింగ్ పూర్తి చేసుకుంది. అయితే, కరోనా, లాక్డౌన్ కారణంగా మిగిలిన షూటింగును నిలిపివేశారు. ప్రస్తుతం చిత్రం యూనిట్ మాత్రం తమతమ ఇళ్లకే పరిమితమైవున్నారు.
ఈ పరిస్థితుల్లో ఈ చిత్రం విడుదల తేదీపై నిర్మాత డీవీవీ దానయ్య సరికొత్త ట్విస్టును వెల్లడించారు. నిజానికి ఈ చిత్రం 2020 జూలై 30వ తేదీన విడుదల కావాల్సి వుంది. కానీ, అనివార్య కారణాల రీత్యా ఈ చిత్ర విడుదలను వచ్చే యేడాది జనవరి 8వ తేదీకి వాయిదా వేశారు. ఈ తేదీలో కూడా ఇపుడు సందిగ్ధత నెలకొంది.
తాజాగా నిర్మాత దానయ్య మాట్లాడుతూ, 'జనవరి 8వ తేదీన ఈ సినిమాను విడుదల చేయాలనే అనుకున్నాం, అయితే లాక్డౌన్ కారణంగా ప్లానింగ్ దెబ్బతింది. ఇంకా చిత్రీకరించవలసిన సన్నివేశాలు ఉన్నాయి. పోస్ట్ ప్రొడక్షన్ పనులు మిగిలు కూడా ఉన్నాయి.
ఇలాంటి కారణాలు వల్ల ముందుగా అనుకున్న సమయానికి ఈ సినిమాను విడుదల చేయలేకపోవచ్చు అని చెప్పుకొచ్చారు. దీంతో వచ్చే వేసవిని దృష్టిలో పెట్టుకుని ఏప్రిల్ 28వ తేదీన ఈ సినిమాను విడుదల చేసే అవకాశాలు వున్నాయనే టాక్ వినిపిస్తోంది.
ఇదే రోజున ప్రభాస్ నటించిన "బాహుబలి-2" చిత్రం కూడా థియేటర్లలోకి వచ్చి భారతీయ చలన చిత్ర పరిశ్రమలో ఎవరూ అందుకోలేనంత స్థాయిలో రికార్డులు నెలకొల్పింది.