తెలంగాణాలో నేటి నుంచి ఎంసెట్ కౌన్సిలింగ్ రిజిస్ట్రేషన్ ప్రారంభం!!

తెలంగాణాలో రాష్ట్రంలోని ప్రభుత్వ, ప్రైవేటు ఇంజనీరింగ్ కాలేజీల్లో బీటెక్ కోర్సుల ప్రవేశానికి నిర్వహించే తొలి విడత టీఎస్ ఎంసెంట్ కౌన్సిలింగ్ కోసం రిజిస్ట్రేషన్ ప్రక్రియ గురువారం నుంచి ప్రారంభణవుతుంది. ఈ తొలి విడత కౌన్సెలింగ్ ఈ నెల 12వ తేదీ వరకు జరుగనుంది. ఇందులో పాల్గొనదలచిన విద్యార్థులు ప్రాసెసింగ్ ఫీజు చెల్లించి, ధృపపత్రాల పరిశీలనకు హాజరయ్యే తేదీ స్లాట్‌ను బుక్ చేసుకోవచ్చు. 

ఈ నెల 6 నుంచి 13 వరకు రాష్ట్రవ్యాప్తంగా 36 హెల్ప్‌లైన్ కేంద్రాల్లో ఏదో ఒకచోట ధ్రువపత్రాల పరిశీలనకు హాజరుకావాలి. పరిశీలన చేయించుకున్న వారు ఈ నెల 8 నుంచి 15 వరకు వారికి నచ్చిన కళాశాలలు, కోర్సులను ఎంచుకునేందుకు వెవ్ ఆప్షన్లు ఇచ్చుకోవాలి. వారికి ఈ నెల 19వ తేదీ లేదా ఆ లోపు తొలి విడత సీట్లు కేటాయిస్తామని ఎంసెట్ ప్రవేశాల కన్వీనర్ శ్రీదేవసేన తెలిపారు.

కాగా, గతేడాది వరకు ఫలితాలు విడుదల చేసేందుకు ఒక వెబ్‌సైట్, ప్రవేశాల కౌన్సెలింగ్‌కు మరో వెబ్‌సైట్ ఉండేది. దాంతో విద్యార్థులు అయోమయానికి గురయ్యేవారు. ఈ సారి ఈఏపీ సెట్ వెబ్‌సైట్ (www.eapcet.tsche.ac.in)లోకి వెళ్లినా అక్కడ అడ్మిషన్‌పై క్లిక్ చేస్తే కౌన్సెలింగ్ వెబ్‌సైట్ (www.tseapcet.nic.in)లోకి వెళ్లొచ్చు.