గర్భిణులకు ఓవర్ డోస్ యాంటీబయోటిక్స్.. నకిలీ డాక్టర్ అరెస్ట్

నిబంధనలకు విరుద్ధంగా గర్భిణులకు అల్లోపతి, అధిక మోతాదులో యాంటీబయాటిక్‌ మందులు రాసిన ఆయుర్వేద వైద్యుడిపై తెలంగాణ మెడికల్ కౌన్సిల్ అధికారులు శనివారం కొరడా ఝుళిపించారు. నగరంలోని చంపాపేట్, కర్మన్‌ఘాట్, సైదాబాద్ తదితర ప్రాంతాల్లో టీజీఎంసీ అధికారులు తనిఖీలు చేపట్టారు. 

వైస్ చైర్మన్ డాక్టర్ శ్రీనివాస్, సభ్యులు డాక్టర్ ఇమ్రాన్ అలీ, కో-ఆప్ట్ సభ్యులు డాక్టర్ రాజీవ్ నేతృత్వంలోని బృందం 20 క్లినిక్‌లను తనిఖీ చేసింది. పది మంది నకిలీ వైద్యులపై కేసులు నమోదు చేసింది. 

గర్భిణులకు పరీక్షలు నిర్వహించడమే కాకుండా ఓ ఆయుర్వేద వైద్యుడు ఓ మహిళకు అల్లోపతి మందులు ఇస్తున్నట్లు గుర్తించారు. ఆయుర్వేద వైద్యులు డాక్టర్ రమేష్, డాక్టర్ వీరేష్‌లు అధిక మోతాదులో యాంటీబయాటిక్స్, స్టెరాయిడ్స్, ఇతర అల్లోపతి మందులు ఇస్తున్నట్లు గుర్తించారు. 

ఈ కౌన్సిల్ జిల్లా ఆరోగ్య, వైద్య అధికారికి ఫిర్యాదు చేస్తుందని డాక్టర్ ఇమ్రాన్ అలీ తెలిపారు, తెలంగాణ వ్యాప్తంగా ఇప్పటివరకు పీఎంపీలపై 350 వరకు ఎఫ్‌ఐఆర్‌లు నమోదయ్యాయి. వారికి ఒక సంవత్సరం వరకు జైలు శిక్ష, 5 లక్షల రూపాయల జరిమానా విధించబడుతుంది.