7న తెలంగాణ ముఖ్యమంత్రిగా రేవంత్ రెడ్డి ప్రమాణ స్వీకారం - జోరుగా ఏర్పాట్లు

తెలంగాణ రాష్ట్ర ముఖ్యమంత్రిగా రేవంత్ రెడ్డి గురువారం ప్రమాణ స్వీకారం చేయనున్నారు. ఈ ప్రమాణ స్వీకారోత్సవ ఏర్పాట్లపై ప్రభుత్వ ప్రధాన కార్యదర్శి శాంతికుమారి సమీక్ష నిర్వహించారు. శుక్రవారం ఎల్బీ స్టేడియంలో ఈ ప్రమాణ స్వీకార కార్యక్రమం జరుగుతుంది. సమీక్షా సమావేసంలో డీజీపీ రవి గుప్తా, జీఏడీ ముఖ్య కార్యదర్శి శేషాద్రిలు పాల్గొన్నారు. కాగా కాంగ్రెస్ పార్టీ అధిష్టానం మంగళవారం సాయంత్రం రేవంత్ రెడ్డి పేరును తెలంగాణ రాష్ట్ర ముఖ్యమంత్రిగా ప్రకటించిన విషయం తెల్సిందే. 

మరోవైపు, మిచౌంగ్ తుఫాను నేపథ్యంలో కాబోయే ముఖ్యమంత్రి హోదాలో రేవంత్ రెడ్డి అధికారులకు పలు సూచనలు చేశారు. తనను సీఎల్పీ నేతగా ప్రకటించడానికి కొన్ని నిమిషాల ముందు ఆయన ట్విట్టర్ వేదికగా తుఫాను ప్రభావ అంశంపై ట్వీట్ చేశారు. తెలంగాణలో పలు జిల్లాలలో తుఫాను ప్రభావంపై ఐఎండీ హెచ్చరికల నేపథ్యంలో అధికారులు అప్రమత్తంగా ఉండాలని సూచించారు. 

వరి ధాన్యం తడిసిపోకుండా తగిన జాగ్రత్తలు తీసుకోవాలన్నారు. ఏజెన్సీ, లోతట్టు ప్రాంతాల్లో జన జీవనానికి ఇబ్బంది కలుగకుండా చూడాలని తెలిపారు. అవసరమైన సహాయక చర్యలకు సిద్ధంగా ఉండాలని సూచించారు. కాగా, రేవంత్ రెడ్డికి అత్యధిక ఎమ్మెల్యేల మద్దతు ఉన్నందున ఆయనను సీఎల్పీ నేతగా ఎంపిక చేసినట్లు కేసీ వేణుగోపాల్ తెలిపారు. మొత్తం 64 మంది ఎమ్మెల్యేల్లో రేవంత్ రెడ్డికి ఏకంగా 42 మంది ఎమ్మెల్యేలు మద్దతు తెలిపారు. దీంతో ఆయన పేరును ముఖ్యమంత్రిగా ఎంపిక చేశారు.