పడుపు వృత్తినే నమ్ముకుని జీవనం సాగించేవారి జీవన వ్యధ ఒక్కొక్కరిది ఒక్కోలా వుంటుంది. వ్యభిచారం వృత్తిలోకి కొందరు పేదరికం కారణంగా వస్తే మరికొందరు ట్రాఫికింగ్ మూలంగా ఈ వృత్తిలోకి నెట్టబడతారు. ఐతే ఇక్కడ వారు అనుభవించే వ్యధలు కొన్నిసార్లు బయటకు వస్తుంటాయి. 1997లో జరిగిన ఓ దారుణంపై సుప్రీంకోర్టు తాజాగా తీర్పునిచ్చింది.
11 ఏండ్ల క్రితం ఢిల్లీలో జరిగిన ఆ ఘటన వివరాలు ఇలా వున్నాయి. వ్యభిచార వృత్తిలో వున్న ఓ యువతి వద్దకు నలుగురు వెళ్లారు. ఐతే ఆమె అంతా కలిసి తనపై ఆ కోర్కె తీర్చుకోవడాన్ని ప్రతిఘటించింది. డబ్బులు చెల్లిస్తున్నాం కదా... ఉమ్మడిగా తామంతా ఎందుకు శృంగారం చేయకూడదు అంటూ వాళ్లు వాదనకు దిగారు. ఆమె వాళ్ల కోర్కెకు ససేమిరా అంది. కానీ ఆమె ప్రతిఘటనను లెక్కచేయని ఆ నలుగురు ఆమెపై బలవంతంగా సామూహికంగా అత్యాచారం చేశారు.
ఆమె ఇష్టంతో సంబంధం లేకుండా ఆమెపై తమ పశు వాంఛను తీర్చుకున్నారు. దీనిపై అప్పట్లో ఆమె పోలీసు కేసు పెట్టడంతో అది కోర్టుకు వచ్చింది. ఈ కేసుపై సుప్రీంకోర్టు విచారణ చేపట్టింది. వ్యభిచారం వృత్తిలో వున్నప్పటికీ ఆమె అంగీకారం లేకుండా శృంగారం చేయడం నేరమే అవుతుందనీ, లైంగిక కోర్కెలను తీర్చుకోవడం అత్యాచారంగా పరిగణించాల్సి వుంటుందని హెచ్చరించింది. కేసు తదుపరి విచారణను వాయిదా వేసింది.