తమిళనాడు సీఎం స్టాలిన్ ఇంటికి బాంబు బెదిరింపు

తమిళనాడు ముఖ్యమంత్రి, డీఎంకే అధ్యక్షుడు ఎంకే స్టాలిన్ ఇంటికి బాంబు బెదిరింపు వచ్చింది. సీఎం ఇంటిని బాంబులతో పేల్చివేస్తామంటూ గుర్తు తెలియని అగంతకులు బెదిరించారు. ఈ మేరకు బెదిరింపు ఫోన్ కాల్స్ ఎగ్మోర్ పోలీస్ కంట్రోల్ రూంకు వచ్చాయి. సీఎం స్టాలిన్ ఇంటి వద్ద బాంబు పెట్టామని మరికొద్ది సేపట్లో పేలుతుందని హెచ్చరించారు. దీంతో అప్రమత్తమైన పోలీసులు, బాంబు స్క్వాడ్, పోలీస్ జాగిలాలు ఆ ప్రాంతాన్ని పూర్తిగా ఆధీనంలోకి తీసుకుని అణువణువు తనిఖీ చేశారు. ఆ తర్వాత అది ఫేక్ కాల్ అని తేలడంతో పోలీసులు ఊపిరి పీల్చుకున్నారు. 

ఆ తర్వాత కంట్రోల్ రూమ్‌ ఫోన్ చేసిన యువకుడిని పోలీసులు గుర్తించి అదుపులోకి తీసుకున్నారు. సైబర్ క్రైమ్ పోలీసుల సహాయంతో నిందితుడిని గుర్తించారు. తిరునెల్వేలి జిల్లా సుద్దమిల్లి గ్రామానికి చెందిన తామరైకన్నన్ అనే వ్యక్తి ఈ ఫోన్ కాన్ చేసినట్టు నిర్ధారించి అరెస్టు చేశారు. గంజాయి మత్తులో ఈ పనికి పాల్పడినట్టు పోలీసులు తేల్చారు.