కంటికి రెప్పలా కాపాడాల్సిన కన్నతండ్రి అభంశుభం తెలియని ఆ ఇద్దరు మైనర్ బాలికల పాలిట కామాంధుడిగా మారిపోయాడు. తొలుత పెద్ద కుమార్తెపై అత్యాచారం చేసి జైలుకెళ్లాడు. ఆ తర్వాత ఇటీవలే విడుదలై వచ్చి చిన్న కుమార్తెపై లైంగికదాడికి పాల్పడ్డాడు. భర్త ప్రవర్తనను సందేహించిన భార్య... చిన్న కుమార్తెను వైద్య పరీక్షలకు తీసుకెళ్లగా అసలు విషయం వెలుగులోకి వచ్చింది. ఈ దారుణం మహారాష్ట్రలోని పూణెలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, పూణేకు సమీపంలోని పింప్రి చించ్వాడకు చెందిన ఓ 40 ఏళ్ల వ్యక్తి తన 11 ఏళ్ల కుమార్తెపై అత్యాచారం చేశాడు. దీంతో అతన్ని పోలీసులు అరెస్టు చేసి జైలుకెళ్లాడు.
కరోనా వైరస్ మహమ్మారి కారణంగా ఇటీవల అనేక మంది ఖైదీలను విడుదల చేశారు. దీంతో ఇటీవల ఇంటికి వచ్చిన ఈ కామాంధుడు.. ఈ దఫా తన చిన్న కూతురిపై కన్నేశాడు. భర్త ప్రవర్తనపై అనుమానం వచ్చిన ఈ నీచుడి భార్య.. కుమార్తెను వైద్య పరీక్షలకు తీసుకెళ్లడంతో ఇతను చేసిన ఘాతుకం వెలుగుచూసింది. ఈ ఘటనపై కేసు నమోదు చేసుకున్న పోలీసులు.. సదరు కీచకతండ్రిని అరెస్టు చేశారు.