కోవిడ్-19పై అపోహలను ఛేదిద్దాం-వివక్షను అరికడదాం!

దేశవ్యాప్తంగా కోవిడ్-19 మహమ్మారి విజృంభిస్తూనే ఉంది. ఇటువంటి తరుణంలో వైద్యసిబ్బంది, పారిశుద్ధ్య కార్మికులు, పోలీసులు నిత్యం వారి ప్రాణాలను ఫణంగా పెట్టి మన కోసం ముందుండి పోరాడుతున్నారు.

మనం క్షేమంగా ఉండాలని వాళ్లు సర్వశక్తులూ ఒడ్డుతున్నారు. ఈ క్రమంలో కొందరు కోవిడ్-19 బారినపడ్డారు. మరికొందరు ప్రాణాలు కోల్పోయారు. ఇలాంటి విపత్కర పరిస్థితులలో ఎంతో ఒత్తిడితో పనిచేస్తున్న వారిపట్ల ప్రజలు వివక్ష చూపకూడదు. 

ఈ క్లిష్ట పరిస్థితుల్లో వారు చేస్తున్న సేవలను ప్రశంసించాలి. అంతేకాని వారు, వారి కుటుంబాల పట్ల వివక్ష చూపడం నేరం. అదే విధంగా వారి గురించి గానీ, కోవిడ్-19 గురించి గానీ తప్పుడు ప్రచారం చేయడం సమంజసం కాదు. 

ఈ సంక్షోభ సమయంలో పుకార్లు మరియు తప్పుడు సమాచారం వైద్య సిబ్బంది, పారిశుద్ధ్య కార్మికులు, పోలీసుల్లో తీవ్ర ఒత్తిడిని కలిగిస్తాయి. 

అంతే కాకుండా ఇటువంటి పరిణామాలు కోవిడ్-19 బాధితుల రికవరీపైనా ప్రభావం చూపుతాయి. ఈ నేపథ్యంలో కేంద్ర ఆరోగ్య మంత్రిత్వశాఖ పలు మార్గదర్శకాలను విడుదల చేసింది. 

కోవిడ్-19 సంబంధిత వివక్ష (అపోహ) మూడు ప్రధాన కారకాలపై ఆధారపడి ఉంటుంది:

తగిన సమాచారం లేకపోవడం ,వ్యాధి పట్ల భయం పుకార్లు లేదా తప్పుడు సమాచారం

కళంకం మరియు వివక్షను ఎదుర్కొంటున్న వ్యక్తులు:

కోవిడ్-19 తో బాధపడుతున్న వ్యక్తులు, వారి కుటుంబాలు / సంరక్షకులు / స్నేహితులు

నిర్బంధంలో ఉన్న వ్యక్తులు మరియు వారి కుటుంబాలు:

వైద్యులు, నర్సులు, పారామెడికల్ సిబ్బంది, ఫీల్డ్ వర్కర్స్, హాస్పిటల్ వంటి ఫ్రంట్‌లైన్ హెల్త్ కేర్ ప్రొవైడర్లు మరియు పారిశుద్ధ్య కార్మికులు మొదలైనవారు 

కోవిడ్-19 నుంచి కోలుకున్న వారు, వలస కార్మికులు

కళంకం మరియు వివక్ష వల్ల మనుషులపై ఏవిధంగా ప్రభావం చూపుతాయి?:

వైరస్ లక్షణాలు ఉన్నా దాచిపెట్టడం, వైద్య చికిత్స పొందడానికి సంకోచించడం, హోమ్ క్వారంటైన్ కు ప్రజలు కట్టుబడి ఉండకపోవడం, ఒంటరితనం, అపరాధ భావన మరియు ఆందోళన పెరిగిపోవడం, మనుషుల ఆత్మగౌరవం మరియు విశ్వాసాలపై ప్రభావం చూపడం, కోవిడ్-19 నిర్వహణలో పాలుపంచుకునే వైద్యులు, ఆరోగ్య కార్యకర్తలు ఇతరులను వివక్ష చూపడం, మానసికంగా క్రుంగిపోయి చివరకు డిప్రెషన్ లోకి వెళ్లడం 

వివక్ష లేదా కళంకం కారణంగా కింది పరిస్థితులకు దారితీయవచ్చు:

కోవిడ్-19 కేసుల గురించిన నివేదికలు సరైన సమయానికి రాకపోవడం. కోవిడ్-19 వ్యాప్తి నిర్వహణ మరింత కష్టతరం అవుతుంది. అవసరమైన నివారణ చర్యలు తీసుకోవడంలో సమస్యలు తలెత్తవచ్చు.

కోవిడ్-19 గురించి తెలుసుకోవలసిన విషయాలు:

1. కోవిడ్-19 ప్రమాదకరమైన అంటువ్యాధి అయినప్పటికీ  భౌతిక దూరం పాటించడం ద్వారా, తరచూ చేతులను శుభ్రం చేసుకోవడం మరియు ముఖానికి మాస్కులు ధరించడం ద్వారా మనల్ని మనం రక్షించుకోవచ్చు.

2. ఎన్ని జాగ్రత్తలు తీసుకున్నప్పటికీ  ఒక వ్యక్తి కోవిడ్-19 బారిన పడవచ్చు. అంతమాత్రాన అది అతడు / ఆమె తప్పు కాదు. ఎవరైనా వైరస్ బారిన పడే అవకాశం ఉంటుంది. అందువల్ల ఎవరినీ నిందించాల్సిన అవసరం లేదు.

3. బాధల్లో ఉన్న రోగికి మరియు సంబంధిత కుటుంబానికి మద్దతు మరియు సహకారం అందించాల్సిన అవసరం ఉంటుంది.

4. స్వీయ నిర్బంధం / క్వారంటైన్ లో  ఉన్నవారికి మరియు వారి కుటుంబాలకు అండగా ఉండాలి.

 5. కోవిడ్-19 నుంచి కోలుకున్న వారిని ఆ వైరస్ ను జయించిన వారిగా పరిగణించండి. వారి వల్ల ఇతరులకు ఎలాంటి ప్రమాదం ఉండదు, వైరస్ సంక్రమణ జరగదు.   

చేయాల్సినవి:

విపత్కర పరిస్థితుల్లో మనకు అవసరమైన సేవలను అందిస్తున్న వ్యక్తులను అభినందించండి. వారికి వారి కుటుంబసభ్యులకు అండగా ఉండండి.

కోవిడ్-19 కు సంబంధించిన సమచారాన్ని  సామాజిక మాధ్యమాల్లో పంచుకునే ముందు అది వాస్తవం అని నిర్ధారించుకున్నాకే పంపండి. కోవిడ్-19 నుంచి కోలుకున్న వారి గురుంచి సానుకూల కథనాలను విస్తృతంగా తెలియజేయండి

చేయకూడనివి:

కోవిడ్-19 బారినపడిన, క్వారంటైన్ లో ఉన్నవారి పేర్లను సామాజిక మాధ్యమాల్లో వ్యాప్తి చేయడం

భయం మరియు భయాందోళనలను వ్యాప్తి చేయడం 

వైద్య సిబ్బంది, పారిశుధ్య కార్మికులు, పోలీసులు మనకోసం కష్టపడుతున్నా వారిని లక్ష్యంగా చేసుకోవడం

కోవిడ్-19 యొక్క వ్యాప్తికి ఏదైనా సంఘం లేదా ప్రాంతాన్ని కారణంగా చూపడం

కోవిడ్-19 బారినపడి చికిత్ప పొందుతున్నవారిని బాధితులుగా చిత్రీకరించడం

వివక్షతను అరికడదాం!  కోవిడ్-19 నిర్మూలనకై కలిసి పోరాడదాం!!