ఇక, చూడండి తొందరలోనే పెట్రోల్ లోన్ తీసుకోవాల్సి వస్తుంది..?

పెట్రో ధరలు కొత్త రికార్డులు సృష్టిస్తున్నాయి. ఎన్నడూ లేని విధంగా పెట్రోల్, డీజిల్ ధర ఆల్ టైం హై రికార్డులను సృష్టించాయి. ఈ నేపథ్యంలో పెట్రో ధరలపై సెటైర్లు వేశారు కాంగ్రెస్ సీనియర్ నేత, ఎంపీ శశిథరూర్.

బుధవారం పార్లమెంట్‌లో శశిథరూర్ మాట్లాడుతూ.. ఇతర అంశాలతో పాటు.. బడ్జెట్‌ కేటాయింపులు, నిత్యావసరాల ధరలు, పెట్రో ధరలను ప్రస్తావించారు. రక్షణ, ఆరోగ్య రంగాలలో మోసపూరిత లెక్కలతో ప్రజలను మభ్యపెట్టి మోసగించే ప్రతిపాదనలు చేశారని కామెంట్ చేసిన శశిథరూర్.. లాల్ బహదూర్ శాస్త్రి 'జై జవాన్.. జై కిసాన్' అని నినదిస్తే.. తాజా బడ్జెట్ దానికి పూర్తి వ్యతిరేకంగా నా జవాన్.. నా కిసాన్ అని స్పష్టం చేస్తోందంటూ వ్యాఖ్యానించారు. 

ఇక, ఈ బడ్జెట్ మధ్య తరగతి వారిని పూర్తిగా విస్మరించిందని ఆవేదన వ్యక్తం చేసిన ఆయన.. వారికి ఏం ఇచ్చారని అడిగితే పెట్రోల్ ధరలో పెరుగుదల ఇచ్చారని ఎద్దేవా చేశారు.. 2014 నుంచి పెట్రోల్‌పై ఎక్సైజ్ సుంకం 894 శాతం పెంచేశారని తెలిపిన శశిథరూర్.. ఇక, చూడండి తొందరలోనే పెట్రోల్ కోసం బ్యాంకులో లోన్ తీసుకోవాల్సి వస్తుంది అంటూ సెటైర్లు వేశారు.