వయనాడ్‌లో ప్రధాని పర్యటన.. మంచి నిర్ణయం అన్న రాహుల్ గాంధీ

వయనాడ్‌లో పర్యటించి కొండచరియలు విరిగిపడిన ప్రాంతంలో పరిస్థితిని సమీక్షించినందుకు ప్రధాని నరేంద్ర మోదీకి లోక్‌సభలో ప్రతిపక్ష నేత రాహుల్ గాంధీ కృతజ్ఞతలు తెలిపారు. దీనిని "మంచి నిర్ణయం" అని రాహుల్ అన్నారు. పరిస్థితిని ప్రత్యక్షంగా పరిశీలించడం ద్వారా ఈ విషాదాన్ని "జాతీయ విపత్తు"గా ప్రకటిస్తారని రాహుల్ తన విశ్వాసాన్ని వ్యక్తం చేశారు.

"భయకరమైన విషాదాన్ని మిగిల్చిన వయనాడు పరిస్థితిని వ్యక్తిగతంగా తెలుసుకునేందుకు ఆ ప్రాంతాన్ని సందర్శించినందుకు ధన్యవాదాలు, మోడీ జీ. ఇది మంచి నిర్ణయం. ఒకసారి ప్రధాన మంత్రి విధ్వంసం స్థాయిని ప్రత్యక్షంగా చూసిన తర్వాత, దానిని జాతీయ విపత్తుగా ప్రకటిస్తారని నేను విశ్వసిస్తున్నాను." అంటూ ఎక్స్‌ పోస్ట్‌లో రాహుల్ గాంధీ అన్నారు. 

ప్రధానమంత్రి నరేంద్ర మోదీ శనివారం కేరళలోని కొండచరియలు విరిగిపడిన వాయనాడ్‌ను సందర్శించి, గత నెలలో దక్షిణాది రాష్ట్రాన్ని తాకిన విపత్తు నుండి బయటపడిన వారితో సంభాషించనున్నారు. ప్రధానమంత్రి ప్రత్యేక విమానంలో కన్నూర్‌లో దిగనున్నారు.

కన్నూరు నుంచి ప్రధాని మోదీ హెలికాప్టర్‌లో కొండచరియలు విరిగిపడిన ప్రాంతాల్లో ఏరియల్ సర్వే నిర్వహించనున్నారు. ప్రస్తుతం 10,000 మందికి పైగా ప్రజలు ఆశ్రయం పొందుతున్న కొన్ని సహాయ శిబిరాలను ఆయన సందర్శిస్తారు.

కేరళ గవర్నర్ ఆరిఫ్ మహ్మద్ ఖాన్, ముఖ్యమంత్రి పినరయి విజయన్‌లు ప్రధాని మోదీ కన్నూర్ వచ్చిన తర్వాత ఆయన వెంట వస్తారని భావిస్తున్నారు. ఈ విపత్తును జాతీయ విపత్తుగా ప్రకటించాలని విజయన్ నేతృత్వంలోని రాష్ట్ర ప్రభుత్వం, అలాగే కాంగ్రెస్ నేతృత్వంలోని ప్రతిపక్షాలు కేంద్ర ప్రభుత్వాన్ని డిమాండ్ చేస్తున్నాయి. 

ఇదిలా ఉండగా, ఈ విపత్తులో 152 మంది గల్లంతైన వారి సంఖ్య 413కి పెరిగింది. వయనాడ్ కొండచరియలు విరిగిపడిన విధ్వంసాన్ని జాతీయ విపత్తుగా ప్రకటించాలని రాహుల్ గాంధీ కేంద్ర ప్రభుత్వాన్ని కోరిన కొన్ని గంటల తర్వాత ప్రధాని మోదీ పర్యటన ప్రకటన వెలువడింది.

ఆగస్టు 1న రాహుల్ గాంధీ తన సోదరి, కాంగ్రెస్ ప్రధాన కార్యదర్శి ప్రియాంక గాంధీ వాద్రాతో కలిసి కేరళలోని వాయనాడ్‌లో కొండచరియలు విరిగిపడిన చూరల్‌మల ప్రాంతాన్ని సందర్శించారు.