ప్రమాదంలో చిక్కుకునేలా చేసిన గూగుల్ మ్యాప్.. ఎక్కడ.. ఎలా?

కొత్త ప్రదేశానికి వెళితే మనం చేరుకోవాల్సిన గమ్యస్థానం కోసం ఇతరుల సాయం కోరకుండా చేతిలో ఉన్న స్మార్ట్ ఫోన్ సాయంతో గూగుల్ మ్యాప్‌ను ఎంచుకుంటాం. ఆ మ్యాప్ చూపించే మార్గంలో ముందుకుసాగిపోతాం. కానీ, అలాంటి గూగుల్ మ్యాపే తప్పు చేస్తే.. ఈ తప్పు వల్ల ఓ కుటుంబం పెను ప్రమాదంలో చిక్కుకుంది. ఈ సంఘటన తమిళనాడు రాష్ట్రంలో వెలుగులోకి వచ్చింది. గూగుల్ మ్యాప్ సాయంతో ఇంటికి వెళ్లే ప్రయత్నం చేసిన ఓ వ్యక్తి చివరకు నడుం లోతు నీటిలో చిక్కుకున్నారు. ఈ వివరాలను పరిశీలిస్తే, 

కర్నాటక రాష్ట్రంలోని సర్జాపూర్‌కు చెందిన రాజేశ్ అనే వ్యక్తి తన కుటుంబ సభ్యులతో కలిసి కారులో హోసూరుకు వెళ్లారు. అక్కడ పనులు ముగించుకుని తిరిగి గ్రామానికి బయలుదేరాడు. అయితే, ఈ సారి ఆయన గూగుల్ మ్యాప్ సాయం తీసుకున్నారు. అది చూపించిన దారిలోనే బయలుదేరారు. 

అలా తమిళనాడు రాష్ట్రంలోని కృష్ణగిరి జిల్లాలోని బాగేపల్లి వంతెన వద్దకు చేరుకున్నాడు. అయితే, అక్కడి పరిస్థితులు పట్టించుకోకుండా మ్యాప్‌ను చూసుకుంటా ముందుకు కదిలారు. ఆ తర్వాత కానీ అతడికి తాము ప్రమాదంలో పడినట్టు అర్థంకాలేదు. 

తాము భారీ వరద నీటిలో చిక్కుకునిపోయినట్టు తెలుసుకుని కారు వెనక్కి తిప్పే ప్రయత్నం చేసాడు. అయితే, కారు వరద నీటిలో చిక్కుకుని పోవడంతో తన ప్రయత్నం విఫలమైంది. ఇక పోలీసులు, అగ్నిమాపకసిబ్బంది సాయం కోరారు. 

వారు ఘటనా స్థలానికి చేరుకుని సహాయక చర్యలు చేపట్టారు. భారీ క్రేన్లను ఉపయోగించి వరద నీటిలో చిక్కుకున్న కారును వెలికి తీసి రాజేష్‌తో పాటు అతని కుటుంబ సభ్యులను సురక్షితంగా రక్షించారు.