కాస్టీ బైక్‌పై చీఫ్ జస్టీస్ బాబ్డే - హార్లే డేవిడ్‌స‌న్ బైకుతో ట్రయల్ రన్

దేశ అత్యున్నత న్యాయస్థానం సుప్రీంకోర్టు ప్రధాన న్యాయమూర్తిగా అనేక కీలక తీర్పులు వెలువరించిన ఏస్ఏ బాబ్డేకు... బైక్ రైడింగ్ అంటే మహా ఇష్టం. అందుకే 64 యేళ్ళ బాబ్డే అత్యంత ఖరీదైన హార్లే డేవిడ్‌సన్ బైకును నడిపాడు. గత వారం వీకెండ్‌లో ఆయన నాగ్‌పూర్‌లో ఈ బైకుపై కూర్చొని ఫోటోలకు ఫోజులిచ్చారు. అవి ఇపుడు సోషల్ మీడియాలో వైరల్‌గా మారాయి. 

ప్ర‌స్తుతం లాక్డౌన్ వ‌ల్ల నాగ‌పూర్‌లోని త‌న సొంత ఇంట్లోనే బోబ్డే ఉంటున్నారు. 2019 న‌వంబ‌ర్‌లో భార‌త ప్ర‌ధాన న్యాయ‌మూర్తిగా బోబ్డే బాధ్య‌త‌లు స్వీక‌రించారు. ఆ స‌మ‌యంలో ఇచ్చిన ప‌లు ఇంట‌ర్వ్యూల్లో ఆయ‌న త‌న‌కు బైక్‌ల‌పై ఉన్న మ‌క్కువను వెల్ల‌డించారు. 

ఓసారి బైక్ న‌డుపుతూ ప్ర‌మాదానికి గురికావ‌డ వ‌ల్ల .. కోర్టుకు హాజ‌రుకాలేక‌పోయిన‌ట్లు కూడా తెలిపారు. తాజాగా హార్లే డేవిడ్‌స‌న్ లిమిటెడ్ ఎడిష‌న్ సీవీవో 2020 మోడ‌ల్‌ను సీజే బోబ్డే ట్ర‌య‌ల్ రైడ్‌ చేశారు.  

లాక్డౌన్ స‌మ‌యంలో న్యాయ‌వాదులు న‌ల్ల కోట్లు వేసుకోరాదని, తెల్ల‌టి ష‌ర్ట్‌లు ధ‌రించి, దానిపై బ్లాక్ నెక్ బ్యాండ్ వేసుకుంటే స‌రిపోతుంద‌ని అన్నారు. ఇటీవ‌ల తీర్పుల‌న్నీ వీడియో కాన్ఫ‌రెన్స్‌లోనే నిర్వ‌హిస్తున్నారాయ‌న‌. 

తాజాగా జ‌గ‌న్నాథ ర‌థ‌యాత్రపైన కూడా ఆయ‌న తీర్పునిచ్చారు. యాత్ర‌కు అనుమ‌తిస్తే, జ‌గ‌న్నాథుడు మమ్ముల్ని క్ష‌మించ‌డ‌ని బోబ్డే తీర్పునిచ్చారు. 

అయితే హార్లే డేవిడ్‌స‌న్ సూప‌ర్‌బైక్ పై బోబ్డే.. మాస్క్ లేకుండా ఉండ‌డాన్ని కొంద‌రు నెటిజ‌న్స్ త‌ప్పుప‌ట్టారు. సీజే కొత్త అవ‌తారం బాగున్నా.. లాక్‌డౌన్ నియ‌మావ‌ళి ఉల్లంఘించిన‌ట్లు ఉంద‌ని కొంద‌ర‌న్నారు.