గత కొన్ని నెలలుగా రష్యా, ఉక్రెయిన్ దేశాల మధ్య జరుగుతున్న యుద్ధాన్ని ఆపగల శక్తి భారత్‌కు ఉందని అగ్రరాజ్యం అమెరికా వ్యాఖ్యానించింది. ఇదే అంశంపై శ్వేతసౌధం ప్రతినిధి జాన్ పియర్ స్పందిస్తూ రష్యాతో భారత్‌కు బలమైన దౌత్య సంబంధాలు ఉన్నాయని అందువల్ల రష్యా - ఉక్రెయిన్ దేశాల మధ్య యుద్ధాన్ని ఆపగల శక్తి భారత్‌కు ఉందని చెప్పారు.
ఉక్రెయిన్- రష్యా యుద్ధంపై స్పందించిన భారత్ ప్రధాని నరేంద్ర మోడీ అమాయక చిన్నారులు ఈ యుద్ధంలో బలవడం భయానకమని, వేదన కలిగిస్తోందని రష్యా అధ్యక్షుడు పుతిన్‌తో అన్నారు. ఉక్రెయిన్ రాజధాని కీవ్‌లోని ఆసుపత్రిపై దాడి జరిగిన అనంతరం ప్రధాని ఈ వ్యాఖ్యలు చేశారు. ఈ నేపథ్యంలో స్పందించిన శ్వేత సౌధం ప్రతినిధి భారత్ తలుచుకుంటే యుద్ధం ఆపగలదని వ్యాఖ్యానించారు.
కాగా, ప్రధాని నరేంద్ర మోడీ ఇటీవలే తన రెండు రోజుల రష్యా పర్యటన ముగించుకున్నారు. ఈ సందర్భంగా అధ్యక్షుడు పుతిన్‌తో సమావేశమయ్యారు. ఉక్రెయిన్‌తో యుద్ధం మొదలయ్యాక ఇరు దేశాధినేతలు సమావేశం అవడం ఇదే తొలిసారి. ఈ సందర్భంగా ప్రధాని మోడీని పుతిన్ తమ దేశ అత్యున్నత పౌర పురస్కారంతో సత్కరించారు. కాగా. మోడీ అధికారం చేపట్టినప్పటి నుంచీ ఇప్పటివరకూ పుతిన్‌న్ను 16 సార్లు కలిశారు. ఇక పుతిన్ చివరిసారిగా భారత్‌లో 2021 డిసెంబరులో పర్యటించారు.