అద్భుత ఇంజనీరింగ్‌ సృజనాత్మకత ప్రపంచంలో ఎన్నో అద్భుతమైన నిర్మాణాలకు ప్రాణంపోసింది. అలాంటి మరో నిర్మాణానికి జీవం పోశారు ఇంజనీర్లు. 450 అడుగుల ఎత్తుతో గిటార్ రూపంలో భారీ హోటల్‌ను నిర్మించారు.
ప్రపంచంలో గిటార్ ఆకృతిలో నిర్మించిన మొట్టమొదటి ఈ హోటల్ ను గిటార్ హోటల్‌గా పిలుస్తున్నారు. ఈ భవనం ఇటివలే అందుబాటులోకి రావడంతో అతిథులకు ఆహ్వానం పలుకుతోంది. అమెరికాలోని ఫ్లోరిడాలో ఈ హోటల్ ఉంది.
ఈ హోటల్ నిర్మాణానికి మూడేళ్ల సమయం పట్టింది. సెమినోల్‌ హార్డ్‌ రాక్‌ హోటల్ అండ్‌ కెసినో, హాలీవుడ్‌ ఈ హోటల్‌ను నిర్మించింది. ఈ హోటల్ ప్రారంభం సందర్భంగా ఇన్‌స్టాగ్రామ్‌ వేదికగా సెమినోల్‌ హార్డ్‌ రాక్‌ తన సంతోషాన్ని పంచుకుంది.
హార్డ్‌ రాక్‌ కుటుంబానికి చాలా గొప్పరోజు. గిటార్ హోటల్‌ను అధికారికంగా ప్రారంభించామంటూ సంతోషాన్ని పంచుకుంది. ఇదిలావుండగా అద్భుత ఇంజనీరింగ్‌ మాస్టర్‌ పీస్‌కు ప్రతిరూపమైన ఈ భవనాన్ని చూస్తే ఎవరైనా వారెవ్వా.. అనాల్సిందే.
ఫోర్ట్‌ లాండెర్‌డేల్‌-హాలీవుడ్‌ ఇంటర్నేషనల్‌ ఎయిర్‌పోర్ట్‌ నుంచి విమానాల్లో ప్రయాణించేవారు ఈ హోటల్‌ను వీక్షించవచ్చునని నిర్వాహకులు వెల్లడించారు.