అగ్రరాజ్యం అమెరికా వెళ్లాలనుకునేవారికి ఇది నిజంగానే శుభవార్త. అమెరికా వీసాల కోసం పడిగాపులు కాసే సమయాన్ని బాగా కుదించారు. పలు నగరాల్లో ఈ వెయింటింగ్ సమయాన్ని తగ్గించారు. ఈ మేరకు ట్విటర్ వేదికగా అమెరికా రాయబార కార్యాలయం వెల్లడించింది.
సాధారణంగా అమెరికా వీసా ఇంటర్వ్యూల కోసం రోజుల తరబడి నిరీక్షించాల్సి ఉంటుంది. అలా ఎదురుచూస్తున్న భారతీయులకు అమెరికా రాయబార కార్యాలయం శుభవార్త చెప్పింది. వారాంతంలో 2.5 లక్షల నాన్-ఇమ్మిగ్రెంట్ వీసా అపాయింట్మెంట్లను ఓపెన్ చేసినట్టు భారత్‌లోని అమెరికా రాయబార కార్యాలయం వెల్లడించింది.
తమ కాన్సులర్ బృందానికి ఇది బిజీ వారమని తెలిపింది. https://www.ustraveldocs.com/in/en పై అపాయింట్మెంట్లు బుక్ చేసుకోవచ్చని సూచించింది. ఫలితంగా నాస్ఇమ్మిగ్రెంట్ వీసాలైన బీ1 (బిజినెస్), బీ2 (టూరిస్ట్) ఇంటర్వ్యూ కోసం వేచి చూసే సమయం భారీగా తగ్గింది.
ఈ నిర్ణయం కారణంగా ఢిల్లీలో గతవారం 542 రోజులుగా ఉన్న వెయిటింగ్ టైమ్ ఇప్పుడు 37 రోజులకు తగ్గింది. అలాగే, కోల్‌కతాలో 539 నుంచి 126 రోజులకు తగ్గింది. ముంబైలో 596 నుంచి 322 రోజులకు, చెన్నైలో 526 నుంచి 341 రోజులకు భారీగా తగ్గింది.
కానీ, హైదరాబాద్ నగరంలో మాత్రం ఇందుకు విరుద్ధంగా కొన్ని రోజులు అదనంగా పెరిగాయి. గతవారం వెయిటింగ్ సమయంలో 506 రోజులు ఉండగా ఇప్పుడది 511 రోజులకు చేరడం గమనార్హం. ఇదిలావుండగా ఈ ఏడాది అమెరికా, భారతీయులకు సంబంధించిన 10 లక్షలకు పైగా వీసా దరఖాస్తులను ప్రాసెస్ చేసింది. కరోనా ముందు కంటే ఇది 20 శాతం ఎక్కువని ఎంబసీ అధికారులు తెలిపారు.