రష్యాలో భారీ పేలుడు - 11 అపార్ట్‌మెంట్ భవనాలు నేలమట్టం

ఉక్రెయిన్‌ సరిహద్దులకు అత్యంత సమీపంలో ఉన్న రష్యా నగరం బెల్‌గోరోడ్‌లో ఆదివారం భారీ పేలుళ్లు సంభవించాయి. ఈ ఘటనలో ముగ్గురు చనిపోయినట్లు సమాచారం. పేలుడు తీవ్రతకు మొత్తం 11 అపార్ట్‌మెంట్‌ భవనాలు, 39 నివాస గృహాలు నేలమట్టమయ్యాయి. ఈ దాడిని ఆ ప్రాంత గవర్నర్‌ గ్లాడికోవ్‌ ధ్రువీకరించారు. 

ఈ పేలుళ్ల కారణంగా ఎయిర్‌ డిఫెన్స్‌ వ్యవస్థను యాక్టివేట్‌ చేసినట్లు పేర్కొన్నారు. ఈ దాడిపై ఉక్రెయిన్‌ నుంచి ఎటువంటి ప్రతిస్పందన రాలేదు. ఉక్రెయిన్‌తో యుద్ధం తర్వాత నుంచి తరచూ ఈ విధంగా రష్యాలో ఏదో ఒక ప్రాంతంలో పేలుళ్లు జరుగుతూనే ఉన్నాయి. ముఖ్యంగా కీలకమైన మౌలిక వ్యవస్థలున్న ప్రదేశాల్లో ఇవి చోటుచేసుకోవడం గమనార్హం. 

ఉక్రెయిన్‌కు చెందిన స్పెషల్‌ కమాండో బృందాలు రహస్యంగా రష్యాలోకి చొరబడి కీలక ఆపరేషన్లు నిర్వహిస్తున్నాయని ఇటీవల ది టైమ్స్‌ పత్రిక కథనంలో పేర్కొంది. అత్యున్నత శ్రేణి శిక్షణ పొందిన షామన్‌ రహస్య దళాలు రష్యా కీలక ప్రదేశాలను ధ్వంసం చేయడంపై దృష్టిపెట్టినట్లు వెల్లడించింది. 

ముఖ్యంగా ఉక్రెయిన్‌ దాడికి వినియోగిస్తోన్న ఆయుధాలు, నిర్మాణాలను గుర్తించి ధ్వంసం చేయడం ఈ బెటాలియన్‌ పని.  ఇప్పటి వరకు ఈ దళాలు రష్యా చమురు , ఆయుధ డిపోలు, కమ్యూనికేషన్‌ పరికరాలు వంటి వాటిని లక్ష్యంగా చేసుకొని దాడులు నిర్వహించాయి.