భారత సంతతికి చెందిన నర్సన్ అనే ఓ అమెరికన్ తన ప్రియురాలితో కలిసి మాజీ భార్యను చంపడానికి చేసిన ప్రయత్నం బెడిసికొట్టింది. ఊహించని విధంగా కిరాయి హంతకుడి వేషంలో పోలీసు వచ్చి సాక్ష్యాధారాలతో అతడిని, అతడికి సహకరించిన ప్రియురాలిని అరెస్ట్ చేసారు.
వివరాల్లోకి వెళ్తే, 55 ఏళ్ల నర్సన్‌కు 1995లో పెళ్లైంది. వారిద్దరికీ ఒక కొడుకు, కూతురు ఉన్నారు. 2011లో వారిద్దరి మధ్య భేదాభిప్రాయాలు వచ్చి విడిపోయారు, ఆస్తి విషయంలో చిక్కులు ఉండటంతో ఇంకా అధికారికంగా విడాకులు మంజూరు కాకుండా కేసు కోర్టులో ఉంది. వేరే నేరంలో జైలుకు వెళ్లిన నర్సన్‌కు మరో ఖైదీ పరిచయమయ్యాడు. తనకు తన ప్రియురాలికి మధ్య అడ్డుగా వున్న తన మాజీ భార్యను చంపాలని వుందనీ, ఐతే ఆ పని నేను చేయలేను కాబట్టి అందుకోసం ఒక కిరాయి హంతకుడు కావాలని ఆ ఖైదీతో చెప్పాడు.
జైలు నుండి బయటికొచ్చాక ఆ కిరాయి హంతకుడిని ఓ షాపింగ్ మాల్‌లో కలవాలనుకున్నారు. అక్కడికి వచ్చిన వ్యక్తితో నర్సన్, అతని ప్రియురాలు తమ పథకం గురించి వివరించి బేరం కుదుర్చుకున్నారు. అయితే వ్యవహారమంతా అక్కడే బెడిసికొట్టింది. వచ్చింది కిరాయి హంతకుడు కాదు, ఓ పోలీస్, అతను జరిగిన వ్యవహారాన్నంతా వీడియో తీసి, వారిద్దరినీ అరెస్ట్ చేసాడు.