కరోనా వైరస్ బారినపడి తిరిగి కోలుకున్న అమెరికా అధ్యక్షుడు డోనాల్డ్ ట్రంప్ తిరిగి తన ఎన్నికల ప్రచారాన్ని ప్రారంభించారు. వందలాది మంది మద్దతుదారులు కేరింతలు పెడుతుండగా, వైట్‌హౌస్ వేదికగా, ముఖానికి ధరించిన కరోనా మాస్క్‌ను తొలగించి మరీ ప్రసంగించారు.
'నేనిప్పుడు చాలా బాగున్నాను' అని వైట్‌హౌస్ బాల్కనీ నుంచి ట్రంప్ ప్రసంగించారు. అంతేకాకుండా, 'మరోసారి అమెరికాను గొప్పగా నిలబెట్టేందుకు సిద్ధంగావున్నాను. మరొక్క నాలుగేళ్లు నాకు అవకాశం ఇవ్వండి' అని తన 20 నిమిషాల ప్రసంగంలో ఆయన ఓటర్లను కోరారు. కాగా, ప్రస్తుతం ఉన్న సర్వే వివరాల ప్రకారం, 77 సంవత్సరాల డెమోక్రాట్ అభ్యర్థి జో బైడెన్ కన్నా ట్రంప్ వెనుకంజలో ఉన్నారన్నారు.
మరోవైపు, శనివారం ప్రత్యేక ప్రకటన విడుదల చేసిన వైట్‌హౌస్ డాక్టర్, ట్రంప్‌కు ఇక పూర్తిగా నయమైనట్టేనని, ఆయన్నుంచి వైరస్ వ్యాపిస్తుందన్న ఆందోళన అవసరం లేదని స్పష్టం చేసిన సంగతి తెలిసిందే. ఆయన శరీరంలో యాక్టివ్ వైరస్ సృష్టించబడుతున్నట్టు ఆధారాలు లేవని పరీక్షల తర్వాత నిపుణులు నిర్ధారించినట్టు ప్రకటన వెలువడింది.