ఇంజనీరింగ్ విద్యార్థినిపై అత్యాచారం... ఎక్కడ?

తెలంగాణ రాష్ట్రంలోని ఇబ్రహీంపట్నంలో మరో దారుణం జరిగింది. ఇంజనీరింగ్ విద్యార్థినిపై ఓ యువకుడు అత్యాచారానికి పాల్పడ్డాడు. ఈ సంఘటన రంగారెడ్డి జిల్లా ఇబ్రహీంపట్నం పోలీస్ స్టేషన్ పరిధిలోని ప్రైవేట్ వసతిగృహంలో చోటుచేసుకుంది. స్థానిక పోలీసుల కథనం మేరకు.. ఖమ్మం జిల్లాకు చెందిన విద్యార్థిని ఇబ్రహీంపట్నం మండలం మంగలపల్లి గేట్ వద్ద ఓ ప్రైవేట్ వసతి గృహంలో ఉంటూ సమీపంలోని ఓ ప్రైవేట్ ఇంజినీరింగ్ కళాశాలలో బీటెక్ మొదటి సంవత్సరం చదువుతోంది. 

మంగల పల్లికి చెందిన ఓ స్థిరాస్తి వ్యాపారికి చెందిన ఈ వసతి గృహం కింద స్థిరాస్తి ఆఫీస్ ఉండగా.. పై అంతస్తులో బాలికల వసతిగృహం ఉంది. చివరి అంతస్తులో బుధవారం రాత్రి స్థిరాస్తి వ్యాపారులకు సంబంధించి ఒకరి జన్మదిన వేడుకలు జరిగాయి. రాత్రి 11 గంటల సమయంలో అందులో పాల్గొన్న నల్గొండ జిల్లా గుర్రంపోడు మండలం జోన్నాయిచింతకు చెందిన అజిత్ (22) వసతి గృహంలో ఒంటరిగా ఉంటున్న విద్యార్థిని గదిలోకి వెళ్లి అత్యాచారం చేస్తుండగా కేకలు వినిపించాయి. 

దీంతో పక్క గదిలోని నలుగురు విద్యార్థులు తలుపునకు గడియ పెట్టి డయల్ 100కు ఫోన్ చేయడంతో పోలీసులు వచ్చి నిందితుడిని అదుపులోకి తీసుకున్నారు. నిందితుడు అజిత్ గతంలో వసతి గృహం యజమాని వద్ద గతంలో కారు డ్రైవర్‌గా పనిచేశాడని, వసతి గృహంలో సైతం ఉండేవాడని తెలిసింది. ఈ వసతి గృహం పరిసరాలన్నీ క్షుణ్ణంగా తెలిసివుండటంతో ఈ దారుణానికి తెగబడినట్టు పోలీసులు భావిస్తున్నారు.