అరంగేట్రంతోనే అదరగొట్టింది - ఐపీఎల్ విజేతగా గుజరాత్

ఇండియన్ ప్రీమియర్ లీగ్ 15వ అంచె పోటీలు ఆదివారం రాత్రితో ముగిశాయి. గుజరాత్‌లోని అహ్మదాబాద్ వేదికగా జరిగిన ఫైనల్ పోటీలో గుజరాత్ టైటాన్స్ జట్టు అరంగేట్రంతోనే అదరగొట్టింది. ఫలితంగా ఐపీఎల్ 15వ సీజన్ విజేతగా నిలిచింది. ఈ మ్యాచ్‌లో ప్రత్యర్థి రాజస్థాన్ రాయల్స్ నిర్ధేశించిన 131 పరుగుల విజయలక్ష్యాన్ని ఎలాంటి సంచనాలు లేకుండా సునాయాసంగా ఏడు వికెట్ల తేడాతో విజయభేరీ మోగించింది. తద్వారా ఐఎపీఎల్‌లోకి అడుగుపెట్టిన తొలిసారే టైటిల్ విజేతగా నిలిచి సరికొత్త రికార్డును నెలకొల్పింది. 

ఈ మ్యాచ్‌లో తొలుత బ్యాటింగ్ చేసిన రాజస్థాన్ రాయల్స్ జట్టు నిర్ణీత 20 ఓవర్లలో 9 వికెట్లు కోల్పోయి 130 పరుగులు చేసింది. జట్టులో జైశ్వాల్ 20, బట్లర్ 39, శాంసన్ 14, పడిక్కల్ 2, హెట్మెయిర్ 11, అశ్విన్ 6, రియాన్ 15, బౌల్ట్ 11 చొప్పున పేలవ ప్రదర్శనతో పరుగులు చేశారు. 

ఆ తర్వాత 131 పరుగుల విజయలక్ష్యంతో బరిలోకి దిగిన గుజరాత్ టైటాన్స్ జట్టులో ఓపెనర్ సాహూ (5) త్వరగా ఔట్ అయినప్పటికీ గిల్ (45 నాటౌట్), వేడ్ (8), హార్దిక్ పాండ్యా (34, మిల్లర్ (32 నాటౌట్)లు రాణించగా, అదనంగా 9 పరుగులు వచ్చాయి. దీంతో 18.1 ఓవర్లలో మొత్తం మూడు వికెట్లు కోల్పోయి 133 పరుగులు చేసి ఐపీఎల్ 15 సీజన్ విజేతగా నిలిచింది. 

ఈ విజయంతో గుజరాత్ టైటాన్స్ జట్టు రూ.20 కోట్ల ప్రైజ్ మనీ లభించింది. అలాగే రన్నరప్‌గా నిలిచిన రాజస్థాన్ రాయల్స్ జట్టుకు రూ.13 కోట్లు, క్వాలిఫయర్-2లో ఓటమిపాలై టోర్నీలో మూడో స్థానంలో నిలిచిన రాయల్ ఛాలెంజర్స్ బెంగుళూరు జట్టుకు రూ.7 కోట్లు లభించింది. అలాగే, ఎలిమినేటర్ మ్యాచ్‌లో ఓటమి పాలైన లక్నో సూపర్ జెయింట్స్ జట్టుకు కూడా రూ.6.50 కోట్ల ప్రైజ్ మనీని అందజేశారు.