కరోనా ఒమిక్రాన్ వేరియంట్ వ్యాప్తి తగ్గినప్పటికీ దాని ఉప వేరియంట్లు మాత్రం కొత్తగా పుట్టుకొస్తున్నాయి. తాజాగా ఒమిక్రాన్‌లో రెండు సబ్ వేరియంట్లను గుర్తించారు. వీటికి బీఏ4, బీఏ5 అని నామకరణం చేశారు. ఈ యేడాది ఆరంభంలో కరోనా ఒమిక్రాన్ వైరస్ వ్యాప్తి ఉధృతంగా వ్యాపించిన విషయం తెల్సిందే. దీని నుంచి కొత్తగా ఉప వేరియంట్లు పుట్టుకొస్తున్నాయి. ఇందులోభాగంగా, ఇపుడు ముంబైలో కొత్త వేరియంట్‌ను గుర్తించారు.
ముంబై మహానగరంలో వెలుగు చూసిన ఈ కొత్త వేరియంట్లల ముగ్గురికి బీఏ 4, ఒకరికి బీఏ5 పాజిటివ్ అని తేలింది. అయితే, ఈ నలుగురూ సంపూర్ణ ఆరోగ్యంతో కోలుకున్నట్టు బీఎంసీ వైద్య వర్గాలు వెల్లడించాయి. అయినప్పటికీ వీరిందరిని హోం ఐసోలేషన్‌లో ఉంచినట్టు తెలిపారు.
కాగా, మహారాష్ట్రలో ప్రస్తుతం ఈ సబ్ వేరియంట్ కేసులు 13 నమోదైవున్నాయి. అదేసమయంలో మరికొన్ని ప్రపంచ దేశాల్లో ఈ సబ్ వేరియంట్ల మళ్లీ ఊపందుకున్నాయి. భారత్‌లోనూ కొన్ని రోజులుగా రోజువారీ పాజిటివ్ కేసుల సంఖ్య పెరుగుతున్నప్పటికీ గత 24 గంటల్లో ఈ కేసుల నమోదులో తగ్గుదల కనిపించింది.