ప్రపంచాన్ని కరోనా వైరస్ వణికిస్తోంది. ఈ వైరస్ బారినుంచి ప్రజలను రక్షించేందుకు ఆయా దేశాలు సంపూర్ణ లాక్‌డౌన్లు ప్రకటించాయి. అయినప్పటికీ... ఈ కరోనా గొలుసు కట్టును ఆపలేకపోతున్నారు. పైగా, ఈ వైరస్ బారినపడి చనిపోతున్న వారి సంఖ్య కూడా పెరిగిపోంది. అంతేకాకుండా, కరోనా వైరస్ గాలిద్వారా వ్యాపించే వైరస్ కాకపోయినప్పటికీ... కరోనా వైరస్ బారినపడినవారిని తాకితే సోకే అంటువ్యాధిగా వైద్యులు తేల్చారు.
అయితే, ఇపుడు కళ్ళద్వారా కూడా ఈ వైరస్ సోకుతుందనే ప్రచారం సాగుతోంది. అందువల్ల కరోనా వైరస్ వ్యాప్తిలో కళ్లు ముఖ్యపాత్ర వహిస్తున్నాయని, తగిన జాగ్రత్తలు తీసుకోవాలని చెన్నైలోని ప్రముఖ నేత్ర చికిత్సాలయమైన అగర్వాల్ కంటి ఆస్పత్రి వైద్యసేవల విభాగం డాక్టర్‌ ప్రీతి రవిచందర్‌ తెలిపారు.
ఇదే అంశంపై ఆమె మీడియాతో మాట్లాడుతూ, కరోనా వైరస్‌ను నివారించడంలోనూ, వ్యాపింపజేయడంలోనూ కళ్లు ముఖ్య పాత్ర వహిస్తున్నాయన్నారు. వ్యక్తులు దగ్గినప్పుడు నీటి కణాలు కంట్లోకి పడినా కరోనా వైరస్ వ్యాపిస్తుందన్నారు.
ఈ వైరస్ దేహంలోని అన్ని భాగాలకు చేరుతుందని, తద్వారా ప్రాణాపాయం కలుగుతుందని వివరించారు. సబ్బుతో తరచూ చేతులు శుభ్రం చేసుకోవడం, వేడి నీరు, వేడి ఆహార పదార్థాలు తీసుకోవడం మంచిదన్నారు. నీటిని వీలైనంత ఎక్కువసార్లు తాగాలన్నారు.