నేడు డీఎస్సీ-2008 క్వాలిఫై అభ్యర్థులకు కౌన్సెలింగ్

ఆంధ్రప్రదేశ్ రాష్ట్రంలో గత 2008లో నిర్వహించిన డీఎస్సీ ప్రవేశ పరీక్షల్లో అర్హత సాధించిన అభ్యర్థులకు శనివారం కౌన్సెలింగ్ నిర్వహించనున్నారు. ఆయా జిల్లాల విద్యాశాఖాధికారి కార్యాలయాలు నియామక ఉత్తర్వులివ్వనున్నాయి. 

డీఎస్సీ-2008కి సంబంధించి నియామక ప్రక్రియ మార్పు కారణంగా నిలిచిపోయిన 2,193 మంది సెకండరీ గ్రేడ్‌ టీచర్‌(ఎ్‌సజీటీ)లను మినిమమ్‌ టైమ్‌ స్కేల్‌(ఎంటీఎస్‌)తో కాంట్రాక్టు పద్ధతిలో నియమించాలని ఏపీ ప్రభుత్వం నిర్ణయించిన విషయం తెలిసిందే. 

ఈ నేపథ్యంలో వీరి నియామక ఉత్తర్వులు జారీచేసేందుకు అవసరమైన మార్గదర్శకాలను పాఠశాల విద్య డైరెక్టరేట్‌ శుక్రవారం జారీ చేశారు. జిల్లాల డీఈవోలు ఈ నెల 10న అర్హత కలిగిన అభ్యర్థులకు కౌన్సెలింగ్‌ నిర్వహించాలని పేర్కొన్నారు. 

విద్యాశాఖ జారీచేసిన మార్గదర్శకాలు ఇలా వున్నాయి.. 

* బదిలీ జరిగినప్పటికీ ప్రత్యామ్నాయ ఉపాధ్యాయుడు అందుబాటులో లేని 3, 4 కేటగిరీలలోని ఖాళీలలో నియమించాలి.

* విద్యార్థులు ఉండి, ఉపాధ్యాయులు లేని 3, 4 కేటగిరీలలోని ఖాళీలలో నియమించవచ్చు. 

* 40 మంది కంటే ఎక్కువ విద్యార్థులుండి, బ్లాక్‌ చేయని 3, 4 కేటగిరీలలోని ఖాళీలను వీరితో భర్తీ చేయవచ్చు. 

* నియమించవలసిన ఉపాధ్యాయులకు ఖాళీలు సరిపోకుంటే కేటగిరీ-4లోని ఖాళీలను భర్తీ చేయాలి. 

* అయినప్పటికీ పోస్టులు చాలకపోతే.. కేటగిరీ-3లో బ్లాక్‌ చేసిన ఖాళీలలో భర్తీ చేయవచ్చు.