కాఫీలోని కెఫిన్ కంటికింద గల నల్ల వలయాలను తొలగించటంలో సహాయపడుతుంది. చర్మాన్ని టైట్ చేయటంలో సాయపడి, కంటిచుట్టూ వాపులను తగ్గిస్తుంది. కాఫీలో యాంటీ ఆక్సిడెంట్ చర్మాన్ని రక్షిస్తుంది. జుట్టు ఊడిపోవడం తగ్గించి కాంతివంతంగా, పొడవుగా పెరిగేలా చేస్తుంది. కాఫీ మీ చర్మాన్ని, జుట్టును మరింత ఆరోగ్యవంతంగా, శుభ్రంగా మారుస్తుంది.
చెంచా కాఫీ పౌడర్‌ను తీసుకుని తాజా ఆలోవెరా జెల్‌తో కలుపుకోవాలి. తరువాత ఆ మిశ్రమాన్ని కళ్లకింది నల్లవలయాలపై రాసుకుని 15 నిమిషాల తరువాత చల్లటి నీటిలో కడిగేసుకోవాలి. ఇలా చేయడం వల్ల కంటికింద నల్లవలయాలు తొలగిపోతాయి.
ఒక బౌల్‌లో కొంచెం కాఫీ పొడి, చెంచా తేనెను వేసి కలుపుకోవాలి. ఈ మిశ్రమాన్ని మీ ముఖానికి సమానంగా పట్టించి నెమ్మదిగా మసాజ్ చేయాలి. 20 నిమిషాల తరువాత గోరువెచ్చని నీళ్ళతో కడిగేసుకోవాలి. ఇలా వారానికోసారి చేయడం వలన మెరుగైన వేగవంతమైన ఫలితాలను పొందవచ్చును.
కాఫీ జుట్టును పెరిగేలా చేయటమేకాకుండా, మృదువుగా మెరిసేలా చేస్తుంది. ఈ సింపుల్ కాఫీహెయిర్ మాస్క్ ఎలా తయారుచేయాలో ఇప్పుడు తెలుసుకుందాం. చెంచా కాఫీ పౌడర్‌ను 2 చెంచాల ఆలివ్ నూనెతో కలిపి పేస్టులా తయారుచేసుకోవాలి. ఈ మిశ్రమాన్ని మీ జుట్టుకు పట్టించి గుండ్రంగా నెమ్మదిగా మసాజ్ చేయాలి. 15 లేదా 30 నిమిషాల తరువాత చల్లటి నీళ్ళతో స్నానంచేయాలి. దీన్ని వారానికొకసారి చేయడం వలన మెరుగైన ఫలితాలు పొందవచ్చును.
కొంచెం కాఫీని తయారుచేసి దాన్ని చల్లబరచి దానిని జుట్టకు రాసుకుని కాసేపాగాక జుట్టుకు షాంపూను, కండీషనర్ పట్టించి కడిగితే మీ జుట్టు మెరుస్తూ, మృదువుగా కనిపిస్తుంది. కెఫిన్ మీ చర్మం, జుట్టు రూపాన్ని మెరుగుపరచి వాటిని మరింత ఆరోగ్యవంతంగా మారుస్తుంది.