ప్రేమకు హద్దులు లేవని అనేక మంది యువతీయవకులు పలు సందర్భాల్లో రుజువు చేస్తున్నారు. విదేశీ యువతుల ప్రేమలో పడుతున్న అబ్బాయిలు వారిని పెళ్లి చేసుకుంటున్నారు. ఈ కోవలోనే ఆంధ్రా అబ్బాయికి, ఆప్ఘాన్ అమ్మాయికి మధ్య ప్రేమ చిగురించి, అది పెళ్ళిపీటలెక్కించేలా చేసింది. విజయవాడ నగరంలో వీరిద్దరి పెళ్లి జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, ఆప్ఘాన్ అమ్మాయి విజయవాడకు చెందిన అబ్బాయితో ప్రేమలోపడింది. అమ్మాయి పేరు ఫ్రోజ్‌ షిరీన్‌. అలాగే, అబ్బాయి పేరు వివేకానంద రామన్. అమ్మాయిల గతంలో యూఎన్‌వో కాన్సులేట్‌లో పనిచేసేది. అలాగే, అబ్బాయి కూడా ఢిల్లీలోని ఓ రీసెర్చ్‌ అండ్‌ డెవలప్‌మెంట్‌ విభాగంలో శిక్షణ పొంది, ప్రస్తుత బెంగుళూరులోని ఓ కంపెనీలో పని చేస్తున్నాడు.
అయితే, వీరిద్దరి మధ్య ప్రేమ చిగురించింది. పైగా పెళ్లి చేసుకోవాలని నిర్ణయించుకున్నారు. ఈ విషయాన్ని తల్లిదండ్రులకు చెప్పగా వారు కూడా సంతోషంగా సమ్మతించారు. అంతే... కుటుంబ పెద్దలను ఒప్పించి, పెద్దల సమక్షంలో దండలు మార్చుకున్నారు. ఇద్దరూ కలిసి హిందు సంప్రదాయం ప్రకారం పటమటలోని ఓ కల్యాణ మండపంలో గురువారం వివాహం చేసుకున్నారు.