డబ్బులేని పేదలు పూట గడవడం కోసం నానా తిప్పలు పడుతుంటారు. కానీ కోట్లలో డబ్బు ఆర్జించేవారు మాత్రం నోట్ల కట్టలను రోడ్లపై కార్లలో అటుఇటూ తిప్పుతుంటారు. అంతా బిజినెస్ మాయ. వ్యాపారంలో ప్రభుత్వానికి లెక్క చూపకుండా చాలామంది నల్లడబ్బు వెనకేస్తుంటారు. ఆ డబ్బును దాచేందుకు నానా తంటాలు పడుతుంటారు.
ఇక అసలు విషయానికి వస్తే... నెల్లూరు నుంచి స్విఫ్ట్ కారు రివ్వుమంటూ వెళ్తోంది. ఎప్పటిలాగే కార్లను తనిఖీ చేసే పోలీసులు ఆ కారును కూడా ఆపారు. ఎక్కడికి వెళ్తున్నారు అడిగితే నరసాపురం అని చెప్పారు. కారులో బ్యాగేజ్ గురించి అడిగితే పొంతనలేని సమాధానాలు చెప్పారు. దీనితో అనుమానం వచ్చిన పోలీసులు డిక్కీ ఓపెన్ చేయాలని అడిగారు.
ఓపెన్ చేశాక అక్కడ చూసి పోలీసులు షాకయ్యారు. సంచి నిండుగా కరెన్సీ నోట్ల కట్టలు. ఆ డబ్బు ఎక్కడిది అని అడిగితే సరైన సమాధానం చెప్పలేదు. దీనితో లెక్కలో లేని బ్లాక్ మనీగా పోలీసులు అనుమానిస్తున్నారు. ఆ డబ్బును ఇన్‌కమ్ ట్యాక్స్ డిపార్టుమెంటుకి అప్పగిస్తామని పోలీసులు తెలిపారు.