ఎట్టకేలకు చింతమనేని ప్రభాకర్ అరెస్టు... గుర్తుతెలియని ప్రాంతానికి తరలింపు

ఎట్టకేలకు టీడీపీ నేత, మాజీ ఎమ్మెల్యే చింతమనేని ప్రభాకర్ అరెస్టు అయ్యారు. ఆయన్ను ఎస్టీ ఎస్టీ అట్రాసిటీ కేసు కింద అరెస్టు చేశారు. అనారోగ్యంతో బాధపడుతున్న భార్యను చూసేందుకు వచ్చిన ఆయన్ను పోలీసులు అదుపులోకి తీసుకున్నారు. ఆ తర్వాత ఆయన్ను గుర్తుతెలియని ప్రాంతానికి తరలించారు.

అంతకుముందు ఆయన గత కొన్ని రోజులుగా అజ్ఞాతంలో ఉన్న విషయం తెల్సిందే. ఆయన కోసం ప్రత్యేక బృందం పోలీసులు గాలిస్తూ వచ్చారు. ఈ క్రమంలో తాను బుధవారం ఇంటి వద్దకు వస్తానని దమ్ముంటే అరెస్టు చేసుకోవాలని చింతమనేని సవాల్ విసిరారు. 

ఆ తర్వాత ఆయన చెప్పినట్టుగానే, దుగ్గిరాలలోని తన నివాసానికి ఆయన అనుచరులతో సహా వచ్చారు. అప్పటికే అక్కడ మకాం వేసిన పోలీసులు, ఆయన్ను అరెస్టు చేస్తున్నట్టు ప్రకటించారు. 

అనారోగ్యంతో ఉన్న తన భార్యను కలిసేందుకు తాను వచ్చానని, కానీ పోలీసులు ఏ విధమైన విచారణ చేపట్టకుండానే అరెస్ట్ చేశారని ఈ సందర్భంగా చింతమనేని విమర్శించారు. తనపై జరుగుతున్న రాజకీయ కుట్రలో భాగంగానే కేసుల్లో ఇరికించారని, న్యాయ పోరాటంలో తానే గెలుస్తానని అన్నారు. 

తానే స్వయంగా పోలీసుల ముందుకు వస్తానని చెప్పినప్పటికీ, ఇంత హై డ్రామా ఏంటని ప్రశ్నించారు. పోలీసుల వాహనాలు ముందుకు కదలకుండా ఆయన అనుచరులు అడ్డుకోగా, పోలీసులు వారిని చెదరగొట్టారు.