సూళ్లూరుపేట రైల్వే స్టేషనులో ప్రేమికులపై దాడి... యువతిపై గ్యాంగ్ రేప్...

నెల్లూరు జిల్లా సూళ్లూరుపేటలో మరో ఘాతుకం. స్త్రీని వివస్త్ర చేసి ఐదుగురు అత్యాచారం చేసారు. సూళ్లూరుపేట రైల్వేస్టేషన్‌లో రాత్రి ఈ ఘటన జరిగింది. ఏకాంతంగా రైలు కోసం ఎదురుచూస్తున్న ప్రేమ జంటపై దాడి చేసి ఈ అఘాయిత్యానికి పాల్పడ్డారు. వివరాల్లోకి వెళితే కాకినాడకు చెందిన యువకుడు... బాధితురాలు శ్రీసిటీలో ఒక కంపెనీలో పనిచేస్తున్నారు. 

కొంతకాలంగా వారిద్దరూ ప్రేమించుకుంటున్నారు. ఊరికి వెళ్లేందుకు రైల్వేస్టేషన్‌లో బోకారో ఎక్స్‌ప్రెస్ జనరల్ బోగీ ఎక్కేందుకు ఒకటవ నంబర్ ప్లాట్‌ఫారమ్ చివరన ఉన్న బెంచీపై కూర్చున్నారు. అటుగా వెళ్తున్న కామాంధుల కన్ను వారిపై పడింది. ప్లాట్‌ఫారమ్ నిర్మానుష్యంగా ఉండటంతో వారు చెలరేగిపోయారు. యువకుడిపై దాడి చేసి యువతిని లాక్కుని వెళ్లారు. 

బాధితురాలు కాళ్లావేళ్లా పడి ప్రాధేయపడినా కనికరించకుండా తీసుకువెళ్లి వివస్త్రను చేసారు. రైలు పట్టాల వెంబడి కొట్టుకుంటూ వెళ్లారు. ఒకరి తర్వాత ఒకరు సాముహిక అత్యాచారానికి పాల్పడ్డారు. బాధితుడు, బాధితురాలు ఇచ్చిన ఫిర్యాదును స్వీకరించి పోలీసులు దర్యాప్తును ప్రారంభించారు. ఇప్పటికే ఇద్దరు నిందితులను అరెస్ట్ చేసారు. పరారీలో ఉన్న ముగ్గురు యువకుల కోసం గాలిస్తున్నారు. తీవ్ర రక్త స్రావం అయి అల్లాడుతున్న యువతిని చికిత్స కోసం ఆసుపత్రికి తరలించారు. బాధితురాలు విజయనగరం జిల్లావాసిగా గుర్తించారు.