నారాలోకేష్ అజ్ఞాని, చెల్లని కాసు.. విజయసాయిరెడ్డి

ఏపీ మాజీ సీఎం చంద్రబాబు నాయుడు కుమారుడు నారా లోకేష్‌పై అప్పుడప్పుడు సెటైర్లు పేలుతూనే వుంటాయి. అప్పుడప్పుడు నోరుజారి నెటిజన్లు, ట్రోలర్లకు చిక్కే నారా లోకేష్.. తాజాగా మరోసారి నెటిజన్లకు పని చెప్పారు. నారా లోకేష్‌పై వైఎస్ఆర్ కాంగ్రెస్ పార్టీ విమర్శల ఘాటు పెంచింది. రోజుకోసారి అయినా నారా లోకేష్‌ను విమర్శిస్తూ వైకాపా సోషల్ మీడియాలో ఏకేస్తోంది. 

వైసీపీ జాతీయ ప్రధాన కార్యదర్శి విజయసాయిరెడ్డి.. చంద్రబాబు, లోకేష్‌లను విమర్శిస్తూ మరోసారి పదునైన వ్యాఖ్యలు చేశారు. ఇద్దరిపై తీవ్రంగా విరుచుకుపడ్డారు. నెలకు రూ.5 వేల వేతనం అందుకునే గ్రామ వాలంటీర్లకు వివాహానికి పిల్లను కూడా ఇవ్వరని చంద్రబాబు ఎక్కసెక్కాలాడుతున్నారని ఆగ్రహం వ్యక్తం చేశారు.

‘అప్రయోజకుడు, అజ్ఞాని, చెల్లని కాసు లాంటి మాలోకానికి పెళ్లి అవలేదా?’ అని  నారా లోకేష్‌ను ఉద్దేశిస్తూ విమర్శలు గుప్పించారు. లక్షలాది మందితో పోటీపడి ఉద్యోగాలు సాధించిన వాలంటీర్లు సైనికులకు ఏం తక్కువని చంద్రబాబు అపశకునాలు పలుకుతున్నారని సాయిరెడ్డి ప్రశ్నించారు. తన ట్విట్టర్ ‌ఖాతాలో చంద్రబాబు, నారా లోకేష్‌లను ట్యాగ్ చేస్తూ ట్వీట్ చేశారు.