ఆస్తి కోసం సొంత తమ్ముడినే అన్న చంపేశాడు. తన భార్యతో కలిసి తమ్ముడు మెడకు నైలాన్ తాడు బిగించి హత్య చేశాడు. ఈ దారుణం హైదరాబాద్ నగరంలోని అంబర్ పేటలోని నల్లకుంట పోలీస్ స్టేషన్ పరిధిలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, ఆస్తి నల్లకుంట బాయమ్మ గల్లీలో వెంకటేశ్, రమేశ్‌ అనే ఇద్దరు అన్నదమ్ములు ఒకే ఇంట్లో పక్కపక్క గదుల్లో నివాసం ఉంటున్నారు. కొద్ది రోజులుగా వీరిద్దరూ ఆస్తి విషయమై గొడవపడ్డారు.
ఈ క్రమంలో ఈ నెల 5వ తేదీన గురువారం రమేశ్‌ తాగిన మత్తులో తన గదిలో నిద్రపోతుండగా అతని మెడకు నైలాన్ తాడు బిగించి అతని అన్న వెంకటేశ్, వదిన బబిత కలిసి హత్య చేశారు.
ఈ విషయం ఇరుగుపొరుగు వారి ద్వారా పోలీసులకు సమాచారం చేరింది. దీంతో పోలీసులు వచ్చి ఇద్దరినీ అదుపులోకి తీసుకుని తీసుకుని విచారించగా, వారిద్దరూ హత్య చేసినట్టు అంగీకరించారు. దీంతో నిందితులైన వెంకటేశ్, బబితలను ఆదివారం అరెస్టు చేసి రిమాండ్‌కు తరలించారు.