ఏపీ ముఖ్యమంత్రి, వైకాపా అధినేత జగన్మోహన్ రెడ్డి చేపట్టిన మంత్రివర్గ పునర్వ్యవస్థీకరణ సొంత పార్టీలో అంతర్గత విభేదాలకు దారితీశాయి. మాజీ హోంమంత్రి మేకతోటి సుచరిత మంత్రివర్గంలో చోటు కోల్పోవడంతో తన ఎమ్మెల్యే పదవికి రాజీనామా చేశారు. ఈ విషయాన్ని సుచరిత కుమార్తె ప్రకటించింది.
గత కొన్ని రోజులుగా అనారోగ్యంతో బాధపడుతూ ఇంటికే పరిమితమైన మేకతోటి సుచరిత తన రాజీనామా లేఖను స్పీకర్ ఫార్మెట్‌లో రాసి రాజీనామా లేఖను రాజ్యసభ సభ్యుడు మోపిదేవి వెంకటరమణకు అందజేశారు. తనను బుజ్జగించేందుకు వచ్చిన మోపిదేవికి ఈ రాజీనామా పత్రాన్ని సమర్పించారు.
ఈ సందర్భంగా మేకతోటి సుచరిత అనుచరులు వెంకటరమణ వాహనాన్ని అడ్డుకుని సీఎం వైఎస్‌ జగన్‌మోహన్‌రెడ్డికి వ్యతిరేకంగా నినాదాలు చేశారు. సుచరిత కుమార్తె మీడియాతో మాట్లాడుతూ.. సుచరిత తన రాజీనామా లేఖను స్పీకర్ ఫార్మాట్‌లో వెంకటరమణకు అందజేసి, తాము వైఎస్సార్‌సీపీలోనే కొనసాగుతామని తెలిపారు.