ప్రేమించి పెళ్లాడి నిన్నే వేధించినవాడు.. నన్నెలా లాలిస్తాడమ్మా?

పెద్దలను ఎదిరించి ప్రేమ పెళ్లి చేసుకున్నాడు. ఓ బిడ్డ పుట్టిన తర్వాత వక్రమార్గంలో నడవసాగాడు. భర్తను సక్రమ మార్గంలో పెట్టేందుకు భార్య సాహసం చేయలేకపోయింది. పైగా, భార్యనే నిత్యం వేధింపులకు గురిచేయసాగాడు. ఈ వేధింపులను భరించలేని భార్య ఉరేసుంది. ఈ కారణంగా ఓ చిన్నారి తల్లి ప్రేమకు దూరమైంది. ప్రేమించి పెళ్లి చేసుకున్న నిన్నే వేధించినవాడు.. నన్నెలా లాలిస్తాడమ్మా అంటూ ఆ చిన్నారి బోరున విలపిస్తుంది. ఈ విషాదకర ఘటన ఏపీలోని ఆదోనీ పట్టణంలోని విక్టోరియాపేటలో చోటుచేసుకుంది. 

తాజాగా వెలుగులోకి వచ్చిన ఈ వివరాలను పరిశీలిస్తే, విక్టోరియాపేటకు చెందిన శ్వేత అదే కాలనీకి చెందిన నాగరాజు ప్రేమించుకున్నారు. వీరి పెళ్లికి పెద్దలు నిరాకరించడంతో ఎవరికీ చెప్పకుండా మూడున్నరేళ్ల కిందట వివాహం చేసుకొన్నారు. నాగరాజు ఓ నూనె దుకాణంలో గుమాస్తాగా చేరగా.. శ్వేత ఓ లేడీస్ కార్నర్‌లో పనికి చేరారు. వీరికి రెండేళ్ల కుమార్తె మౌఖిక ఉంది. 

నాగరాజు అతిగా మద్యం తాగుతూ పనికి సరిగా వెళ్లకపోవడంతో ఇద్దరి మధ్య మనస్పర్థలు తలెత్తాయని కుటుంబ సభ్యులు తెలిపారు. శ్వేతను నాగరాజు తరచుగా వేధింపులకు గురిచేయసాగాడు. దీంతో మనస్తాపం చెందిన ఆమె సోమవారం అర్థరాత్రి ఇంట్లో ఫ్యానుకు ఉరేసుకొందని ప్రాణాలు తీసుకుంది. మృతురాలి తండ్రి కృష్ణ ఫిర్యాదు మేరకు పోలీసులు కేసు నమోదు చేశారు. శ్వేత మృతితో రెండేళ్ల కుమార్తె మౌఖిక అనాథగా మారింది.