Publish Date: Tue, 07 Jan 2025 (16:16 IST)
Updated Date: Tue, 07 Jan 2025 (16:18 IST)
అభంశుభం తెలియని చిన్నారుల పాలిట కంటికి రెప్పలా కాపాడాల్సిన తండ్రి కామాంధుడయ్యాడు. తన కుమార్తెలపై అఘాయిత్యం చేసి తండ్రి అనే పదానికే మచ్చ తెచ్చాడు ఈ కసాయి తండ్రి. అన్నమయ్య జిల్లాలో జరిగిన దారుణం వివరాలు ఇలా వున్నాయి. అన్నమయ్య జిల్లా నిమ్మనపల్లి మండలం కొండయ్యగారిపల్లి పంచాయతీ వెంకోజిగారిపల్లి శివాజీనగరులో నివాసం వుంటున్న బోయకొండ-చిట్టెమ్మకు ఐదుగురు సంతానం. వీరిలో మగపిల్లవాడు పెద్దవాడు కాగా మిగిలిన నలుగురు ఆడపిల్లలు.
కుటుంబ పోషణ కోసం చిట్టెమ్మ గాజులు అమ్మేందుకు వెళ్తుంటుంది. పిల్లలు చెట్లు కోసేందుకు వెళ్తుంటారు. బోయకొండ మాత్రం భార్యాపిల్లలు సంపాదించిన డబ్బుతో జల్సాలు చేస్తూ పూటుగా మద్యం సేవిస్తుంటాడు. ఈ క్రమంలో అతడి వక్ర చూపు కన్నబిడ్డలపై పడింది. దీనితో 9 ఏళ్ల పెద్ద కుమార్తెపై లైంగిక దాడి చేసాడు. ఆ తర్వాత 7 ఏళ్ల చిన్న కుమార్తె పైనా కామకోర్కె తీర్చుకున్నాడు. మరుసటి రోజు కూడా తన చిన్న కుమార్తెను వెంటబెట్టుకుని బైటకు తీసుకుని వెళ్తుండగా బోయకొండ అత్త గమనించి పిల్లను ఎక్కడికి తీసుకెళ్తున్నావని గద్దించడంతో ఆమెను అక్కడే వదిలేసి వెళ్లాడు.
ఐతే మరుసటి రోజు నుంచి పిల్లలిద్దరూ కడుపు నొప్పితో బాధపడుతున్నారు. ఏం జరిగిందని ఆరా తీయగా... నాన్న మమ్మల్ని బయటకు తీసుకెళ్లి ఏదో చేసాడు, అప్పట్నుంచి మాకు కడుపు నొప్పి వస్తుందని చెప్పారు. దీనితో విషయం గ్రహించిన బోయకొండ భార్య చిట్టెమ్మ భర్తపై పోలీసులకు ఫిర్యాదు చేసింది. చిన్నారుల పట్ల కామాంధడిగా మారిన బోయకొండపై పోక్సో చట్టం కింద కేసు నమోదు చేసి దర్యాప్తు చేస్తున్నారు పోలీసులు.
