ప్రేమ - ప్రణయం - పేరు ఏదేనా ఫీలింగ్ ఒక్కటే.. నేడు 'ప్రేమికుల దినోత్సవం'

ప్రేమ, ప్రణయం.. ఈ రెండు పదాలు వేర్వేరు కావొచ్చు. కానీ కలిగే ఫీలింగ్ మాత్రం ఒక్కటే. పేద, ధనిక వంటి అంతరాలు ఉన్నా.. కులం, మతం, వర్గాలు ఏవైనా స్వభావం మాత్ర ఒక్కటే. ఈ సృష్టిలో ప్రేమించని, ప్రేమలో పడని స్త్రీ పురుషులు ఉండరంటే అతిశయోక్తికాదు. సృష్టిలో ఏజీవికి లేని అదృష్టం మనుషులకు ఉందని చెప్పొచ్చు. అలాంటి మనుషులు (ప్రేమికులు) నేడు ప్రేమికుల దినోత్సవాన్ని జరుపుకుంటారు. 

ప్రేమ... అనేది ఒక అనిర్వచనీయమైన భావన. చెప్పలేని అనుభూతి. మోయలేని భారం. రాయలేని కావ్యం. చివరి మజిలీ అంటూ లేని ప్రయాణం, స్నేహంతో ప్రారంభమై పెళ్లితో ముగిసిపోయేది కాదు. ఆదిలోనే హంసపాదులు ఎన్ని వచ్చినా ఆగిపోయేది అసలే కాదు. అది నిరంతరం జరిగే ప్రక్రియ. కాలం మారే కొద్దీ పెరిగే ఫీలింగ్. కేరింగ్. తల్లిదండ్రుల నుంచి మొదలుకుని జీవిత భాగస్వామి వరకు ప్రతి సందర్భంలోనూ మానవులు దీన్ని అనుభవిస్తారు. ఆస్వాదిస్తారు. 

ప్రేమ అంటే కేవలం ఇవ్వడం మాత్రమే కాదు. పొందడం కూడా ప్రేమే. పరిశుద్ధ గ్రంథంగా పేరొందిన బైబిల్‌లోనూ, ప్రేమ విశ్వాసం, నిరీక్షణ అనే ముఖ్యమైన మూడు విషయాలను గురించి చెబుతూ వీటిన్నింటిలోకెల్లా ప్రేమే గొప్పది అని రాసి ఉంటుంది. అవసరాల కోసమో, ఆర్థిక లాభాల కోసమే ప్రేమించకండి. సోషల్ మీడియాలో వాడకం విపరీతంగా పెరిగిపోయిన నేటి కాలంలో వాట్సాప్ స్టేటస్‌లు, ఇన్‌స్టా రీల్స్ చూసి లేదా అవి చేసిన వారిని చూసి ప్రేమించకండి. మీ మనస్సుకు నచ్చిన వారిని ప్రేమించిండి.