మెగాస్టార్ చిరంజీవి తన తమ్ముడు పవన్ కల్యాణ్ హరిహర వీరమల్లు లుక్ లో అదిరిపోయాడని ప్రశంసించారు. అసలు తమ్ముడు పవన్ కళ్యాణ్ తో ఇలాంటి చిత్రం చేయొచ్చు అని డిసైడ్ చేసిన దర్శకుడు క్రిష్ కు నా అభినందనలు. ఈ హిస్టారికల్ చిత్రాన్ని తీయాలని సంకల్పించిన మెగాసూర్య మూవీస్‌ని అభినందిస్తున్నా అన్నారు.
కాగా పవర్ స్టార్ పవన్ కళ్యాణ్ హరిహర వీరమల్లు లుక్ టాలీవుడ్ ఇండస్ట్రీలో చర్చకు దారి తీసింది. పవన్ లుక్ డిఫరెంటుగా వుందనీ, ఈ చిత్రం ఖచ్చితంగా బాక్సాఫీస్ వద్ద రికార్డులు సృష్టిస్తుందని అంటున్నారు. వచ్చే 2020 సంక్రాంతికి విడుదల కానుంది. ఇదిలావుంటే ఈ చిత్రం గురించి మరో ఆసక్తికర వార్త బయటకు వచ్చింది.
మొఘల్ సామ్రాజ్య చక్రవర్తి ఔరంగజేబు కాలం నాటి కథతో తెరకెక్కుతున్న ఈ చిత్రంలో ఔరంగజేబుగా అర్జున్ రాంపాల్ నటించనున్నారట. ఆయన సోదరి పాత్రలో బాలీవుడ్ నటి జాక్వెలిన్ ఫెర్నాండెజ్ కనిపించనున్నట్లు సమాచారం. ఔరంగజేబు సోదరికి హరిహర వీరమల్లుకు మధ్య కెమిస్ట్రీ ఏంటన్నది మరో పాయింట్.
ఇకపోతే ఈ చిత్రంలో పవన్ కళ్యాణ్ వజ్రాల దొంగగా కనిపించనున్నట్లు తెలుస్తోంది. పవన్ సరసన నిధి అగర్వాల్ నటించనుంది. మెగా సూర్య ప్రొడక్షన్ పతాకంపై ఏఎం రత్నం నిర్మిస్తున్న ఈ చిత్రానికి క్రిష్ దర్శకత్వం వహిస్తున్నారు.