మహారాష్ట్రలో ఎస్.ఎస్.సి. ఇంటర్ పరీక్షలు జరుగుతున్నాయి. ఈ పరీక్షల నిర్వహణకు విద్యాశాఖ గట్టి భద్రతా చర్యలు చేపట్టింది. అయితే, ఈ పరీక్షలు రాస్తున్న కొడుక్కి సాయం చేసేందుకు ఓ తండ్రి ప్రయత్నించి, పోలీసులతో తన్నులు తిన్నాడు. ఆ వ్యక్తిని పోలీసులు కొడుతున్న వీడియో ఒకటి ఇపుడు సోషల్ మీడియాలో వైరల్ అయింది.
రాష్ట్రంలోని జల్గావ్ జిల్లా చోప్రా తహసీల్ అడవాడ్ గ్రామంలో నూతన్ జ్ఞాన మందిర్ విద్యాలయంలో విద్యార్థులు మరాఠీ పరీక్ష రాస్తున్నారు. ఈ కేంద్రంలో పరీక్ష రాస్తున్న తన కొడుకుకు సాయం చేయాలని ఓ తండ్రి నిర్ణయించుకున్నాడు. కాపీ చేసేందుకు వీలుగా కొన్ని స్లిప్పులు పట్టుకుని పరీక్షా కేంద్రం వద్దకు వెళ్లాడు. తన కొడుకు ఏ గదిలో ఉన్నాడోనని వెతుకుతుండగా విధుల్లో ఉన్న పోలీసులు గమనించి తొలుత హెచ్చరించి, అక్కడ నుంచి పంపించి వేశారు.
ఆ తర్వాత మరికొంత సేపటికి మరోమారు ప్రయత్నించేందుకు పరీక్షా కేంద్రం వద్దకు వెళ్లాడు. దీంతో పోలీసులు పట్టుకోవడంతో విడిపించుకుని పారిపోయేందుకు ప్రయత్నం చేశాడు. ఒకటికి రెండుసార్లు పోలీసులు చెప్పినా పోలీసులు వినిపించుకోలేదు. దీంతో ఆ వ్యక్తిని ఓ పోలీస్ లాఠీతో చితకబాదాడు. ఈ తతంగాన్నంతా అక్కడ ఉన్న పోలీసులు తమ ఫోన్లలో రికార్డు చేసి సోషల్ మీడియాలో పోస్ట్ చేశాడు. దీంతో ఈ వీడియో కాస్త వైరల్ అయింది.