మెగాస్టార్ చిరంజీవి నటించిన "సైరా నరసింహా రెడ్డి" చిత్రం బుధవారం ప్రపంచ వ్యాప్తంగా విడుదలైంది. భారత్‌లో మాత్రం పాన్ ఇండియా మూవీగా వచ్చింది. ఈ చిత్రంలో బాలీవుడ్ సూపర్ స్టార్ అమితాబ్ బచ్చన్ ఓ కీలకమైన పాత్రను పోషించారు. అయితే, ఈ చిత్రం దక్షిణాదిలో తిరుగులేకుండా పోయింది. ఇక బాలీవుడ్‌లో సైతం 'సైరా' తన హవాను కొనసాగిస్తోంది.
నిజానికి బాలీవుడ్‌లో సైరా నరసింహా రెడ్డి చిత్రాన్ని వాయిదా వేయనున్నారనే ప్రచారం సాగింది. దీనికి ప్రధాన కారణం... వార్ చిత్రమే. హృతిక్ రోషన్, టైగర్ ష్రాఫ్ వంటి స్టార్ హీరోలు నటించిన వార్ మూవీ కూడా అక్టోబరు రెండో తేదీనే విడుదలైంది. దీంతో చిరంజీవి నటించిన సైరా మూవీని ఒక వారం రోజుల పాటు వాయిదా వేయనున్నారన్న ప్రచారం సాగింది. అయితే, ఈ వార్తలను తోసిపుచ్చిన నిర్మాత రామ్ చరణ్ యధావిధిగానే అనుకున్న తేదీనే చిత్రాన్ని విడుదల చేశారు.
దీంతో బాలీవుడ్‌లో వార్ వర్సెస్ సైరాగా మారింది. కానీ, ఈ రెండు చిత్రాల్లో విభిన్నమైన టాక్‌ను సొంతం చేసుకున్నాయి. వార్ మూవి నెగెటివ్ టాక్‌ను సొంతం చేసుకోగా, సైరా పాజిటివ్ టాక్‌ను సొంతం చేసుకుంది. దీంతో బాలీవుడ్‌లో చిరంజీవి సైరా అంటూ సత్తా చాటాడని అంటున్నారు. నిజానికి బాలీవుడ్‌లో సైరా కంటే వార్ మూవీపైనే భారీ అంచనాలు ఉన్నాయి. కానీ, నెగెటివ్ టాక్‌తో సైరా కంటే వార్ మూవీ వెనుకబడిపోయింది.