ప్రిన్స్ మహేష్ బాబు సాయం: రెండు చేతులెత్తి దణ్ణం పెట్టిన తూ.గో దంపతులు

టాలీవుడ్ ప్రిన్స్ మహేష్ బాబు మరోసారి తన సేవానిరతిని చాటుకున్నారు. తాజాగా ఓ చిన్నారికి అరుదైన గుండె శస్త్ర చికిత్సకు అవసరమైన డబ్బును సమకూర్చి ఆ చిన్నారిని ప్రాణాపాయం నుంచి రక్షించారు. 

వివరాల్లోకి వెళితే... విజయవాడలోని ఆంధ్ర హాస్పిటల్ హార్ట్ అండ్ బ్రెయిన్ ఇన్స్టిట్యూట్లో నెల రోజుల శిశువు అరుదైన గుండె సమస్యతో పోరాడుతున్నట్లు మహేష్ బాబు దృష్టికి వచ్చింది. ఈ విషయం తెలుసుకున్న సినీ నటుడు మహేష్ బాబు పాపకు వైద్య చికిత్సలు చేయాలని వైద్యులను కోరారు.

దీనితో తూర్పుగోదావరి జిల్లా ఆళ్లవరం మండలం తుమ్మలపల్లి గ్రామానికి చెందిన నాగజ్యోతి ప్రదీప్ దంపతుల శిశువును ఆసుపత్రికి తీసుకురాగానే ఈ నెల 2న ఉచితంగా శస్త్రచికిత్స చేశారు వైద్యులు. అలా పాప రెండు వారాల తర్వాత ఇంటెన్సివ్ కేర్ నుంచి ఆరోగ్యంగా డిశ్చార్జ్ అయింది. పాపను రక్షించినందుకు ఆ దంపతులు మహేష్ బాబుకి రెండు చేతులెత్తి దణ్ణం పెట్టారు.