సినీ ఇండస్ట్రీలో క్యాస్టింగ్ కౌచ్ గురించి తెలిసిందే. శ్రీరెడ్డి, చిన్మయి వంటి వారు క్యాస్టింగ్ కౌచ్, లైంగిక వేధింపులపై ఇప్పటికే గళం విప్పారు. తాజాగా తమిళ ''జయం''లో సదాకు చెల్లెలుగా నటించిన కళ్యాణి బాలనటి నుంచి హీరోయిన్ స్థాయికి ఎదిగింది.
ప్రస్తుతం సినిమాలకు దూరంగా వుంటుంది. ఇందుకు కారణాలు కూడా చెప్పుకొచ్చింది. తాజాగా ఓ ఇంటర్వ్యూలో ఇండస్ట్రీకి వచ్చిన కొత్తల్లోనే ప్రభుదేవాతో కలిసి అలై తండా వానమ్ చిత్రంలో నటించినట్టు చెప్పిన కల్యాణి.. తనకు వరుసపెట్టి అవకాశాలు వచ్చిన విషయాన్ని గుర్తు చేసింది.
తనకు వరుసపెట్టి అవకాశాలు వస్తున్న సమయంలో ఇండస్ట్రీకి చెందిన పలువురు ప్రముఖులు తన తల్లికి ఫోన్ చేసి సినిమాల్లో నటించాలంటే కొన్ని విషయాల్లో సర్దుకుపోవాలని అన్నారని గుర్తు చేసుకుంది. పరిశ్రమలో తనకు ఎదురైన లైంగిక వేధింపుల వల్లే తాను ఇండస్ట్రీకి దూరమయ్యానని వెల్లడించింది.
ప్రస్తుతం కుటుంబంతో కలిసి సంతోషంగా జీవిస్తున్నట్టు తెలిపింది. సర్దుకుపోవాలనే చాలామంది చెప్తుంటే.. వారి మాటలతోనే తాను సినీ రంగానికి దూరమైనట్టు కల్యాణి చెప్పింది. ఆ తర్వాత పలు సీరియళ్లలో నటించి పేరు తెచ్చుకున్నానని, అయితే, అక్కడ కూడా వేధింపులు ఎదురవడంతో ఇక పూర్తిగా నటనకు దూరమయ్యానని కల్యాణి వివరించింది.