Kartikeya: ఏడు ఏళ్లు పూర్తి చేసుకున్న ట్రెండ్ సెట్టర్ ఆర్ ఎక్స్ 100

RX 100- 7 years poster

కొన్ని కథలు, అవి క్రియేట్ చేసిన రికార్డులు, ఏళ్ళు గడిచినా అలా చెక్కుచెదరకుండా మిగిలిపోతాయి, విడుదలైన మొదటి రోజున వచ్చిన రెస్పాన్స్ చిరకాలం కళ్ళ ముందు మెదులుతూ ఉంటుంది. అలాంటి సినిమానే దర్శకుడు అజయ్ భూపతి – హీరో కార్తికేయ మొదటి చిత్రం "ఆర్ ఎక్స్ 100 ". 7 ఏళ్లు పూర్తి చేసుకున్న ఈ రియల్ కల్ట్ బ్లాక్బస్టర్ చిత్రానికి ఇప్పటికీ ప్రేక్షకుల మనసులలో విభిన్న స్థానం ఉంది.

చిన్న సినిమాగా కార్తికేయ క్రియేటివ్ వర్క్స్ బ్యానర్ లో, ఓ చిన్న టౌన్ నేప‌థ్యంలో నడిచిన ఈ రియ‌లిస్టిక్ ల‌వ్ స్టోరీ తెలుగు రాష్ట్రాల్లో 26 సెంటర్లలో 50 రోజులు ప్రదర్శితమైంది. 2 కోట్లతో నిర్మించిన చిత్రానికి బాక్సాఫీస్ వద్ద 25కోట్లకు పైగా వసూళ్ళు రాగా డిస్ట్రిబ్యూటర్లకు భారీ లాభాలు తెచ్చిపెట్టింది.

సినిమా విడుదలకు ముందే పాటలు, ట్రైలర్ తో విపరీతమైన బజ్ క్రియేట్ చేసుకుని, దర్శకుడు అజయ్ భూపతి – హీరో కార్తికేయ హై వోల్టేజ్ కంటెంట్, పెర్ఫార్మెన్స్ తో సినిమా విడుదలైన మొదటి రోజు నుండే యువతకు బాగా కనెక్ట్ అయ్యింది. ఒక్క తెలుగు భాషలోనే కాకుండా హిందీ, ఒడియా, కన్నడ భాషల్లో ఈ చిత్రాన్ని రీమేక్ చేయగా తమిళ్ మరియు ఇతర భాషల్లో కూడా రీమేక్ చేసే చర్చలు జరిగాయి. ఈ చిత్ర కథ, కథనాల ప్రేరణతో తెలుగుతో పాటు ఇతర భాషల్లో చాలా చిత్రాలు తెరకెక్కాయి. 

దర్శకుడు అజయ్ భూపతి, హీరో కార్తికేయ, హీరోయిన్ పాయల రాజ్ పుత్, చిత్రంలో నటించిన నటీనటులు, టెక్నీషియన్ల కి ఆ తరువాత అద్భుతమైన అవార్డులు, అవకాశాలు రాగా, వారి కెరీర్లో మొదటి మేటి చిత్రంగా "ఆర్ ఎక్స్ 100" ఎప్పటికీ నిలిచిపోతుంది.

ఈ చిత్రానికి ఉన్న కల్ట్ ఫాలోయింగ్ వల్ల రీ–రిలీజ్ కి కూడా విపరీతమైన డిమాండ్ ఉంది. అయితే, అది త్వరలో జరగాలని ప్రేక్షకులతో పాటు ఇండస్ట్రీ వర్గాలు కూడా ఎదురుచూస్తున్నాయి.