జెర్సీ ఎలా ఉంటుందో ముందే చెప్పేసిన హీరోయిన్ శ్రద్ధ శ్రీనాథ్

అందంలో అభినయంలో తనకంటూ ఓ ప్రత్యేకమైన శైలితో దూసుకొస్తోన్న ప్రతిభావంతురాలైన కన్నడ నటి 'శ్రద్ధ శ్రీనాథ్'. 'జెర్సీ' సినిమాలో నాని సరసన నటిస్తూ హీరోయిన్‌గా తెలుగు తెరకు పరిచయం అవుతోంది ఈ కన్నడ బ్యూటీ. నేచురల్ స్టార్ నాని హీరోగా 'మళ్ళీ రావా' ఫేం గౌతమ్ తిన్ననూరి దర్శకత్వంలో సితార ఎంటర్‌టైన్‌మెంట్స్ పతాకంపై సూర్యదేవర నాగ వంశీ నిర్మిస్తున్న 'జెర్సీ' సినిమాతో ఈ నెల ‌19న ప్రేక్షకుల ముందుకు రాబోతుంది. 

ఈ సంద‌ర్భంగా ఏర్పాటు చేసిన మీడియా మీట్లో శ్ర‌ద్ధ శ్రీనాథ్ మాట్లాడుతూ... 'జెర్సీ' సినిమాకు సంబంధించి తన వర్క్ పట్ల శ్రద్ధ చాలా సంతోషంగా ఉన్నట్లు తెలిపింది. ఈ సినిమాలో తనకు అమోఘమైన భావోద్వేగాలను పండించగ‌ల సన్నివేశాల్లో నటించే అవకాశం రావడం చాలా ఆనందం కలిగించిందని చెప్పుకొచ్చింది. అలాగే సినిమాలో టీనేజర్‌గా మరియు ఒక మదర్‌గా ఇలా వేరువేరు దశలలో కనిపిస్తానని తెలిపింది.

ఇక నాని పక్కన నటించడం గురించి చెప్తూ.. నాని సహజ నటుడని, ఎలాంటి సన్నివేశాన్ని అయినా ఆయన చాలా సింపుల్ వే‌లో చక్కని హావభావాలతో నటిస్తారని.. ఆయన పక్కన నటించడం గొప్ప గౌరవంగా భావిస్తున్నానని.. అదేవిధంగా ఈ సినిమా ఒప్పుకోవడానికి నానితో పాటుగా దర్శకుడు గౌతమ్ తిన్ననూరి, నిర్మాత సూర్యదేవర నాగ వంశీ, అనిరుధ్‌లతో మొత్తం చిత్ర బృందం కూడా కారణమని.. వారి పనితనం వల్లే 'జెర్సీ' సినిమా అమోఘమైన భావోద్వేగాలతో అద్భుతంగా వచ్చిందని శ్రద్ధ శ్రీనాథ్ చెప్పుకొచ్చింది. కాగా కొన్ని సంవత్సరాలు పాటు హైదరాబాద్‌లోనే పెరిగిన శ్రద్ధ.. ఇప్పటికే పలు కన్నడ మరియు తమిళ్ సినిమాల్లో కూడా నటించింది.